शिवाजी सावंत
गारगोटी : भुदरगड तालुक्यात ग्रामपंचायत निवडणुकीची रणधुमाळी सुरू झाली असून, तालुक्यासह जिल्ह्यात लक्षवेधी निवडणूक खानापूर गावची होणार आहे. भाजपचे प्रदेशाध्यक्ष चंद्रकांत पाटील यांचे हे जन्मगाव आहे. त्यांच्या दृष्टीने ही निवडणूक महत्त्वाची ठरणार आहे. भाजपप्रणित स्थानिक आघाडीत काँग्रेस, राष्ट्रवादी, काँग्रेस यांच्या गटाचा समावेश आहे; तर आमदार प्रकाश आबिटकर गट विरोधात तयारी करीत आहे. आमदार पाटील यांच्यावर ‘गावची निवडणूक जिंकून दाखवा,’ अशी सातत्याने विरोधकांतून टीका होत असते; त्यामुळे या निवडणुकीला एक वेगळे महत्त्व प्राप्त झाले आहे. आमदार पाटील यांचेही गावाकडील निवडणुकीकडे सातत्याने लक्ष असून ते प्रत्येक दिवसाचा आढावा घेत आहेत. विशेष म्हणजे भाजपबरोबर राष्ट्रवादी व काँग्रेसचे कार्यकर्तेही आघाडीत सामील झाले आहेत.
भाजप, काँग्रेस, राष्ट्रवादी आघाडीचे नेतृत्व भाजपचे जिल्हा सरचिटणीस प्रवीणसिंह सावंत, काँग्रेसचे भुजंगराव मगदूम, सुनील मांगले, संदीप पाटील, संजय रेडेकर करीत आहेत; तर आमदार प्रकाश आबिटकर गटाचे नेतृत्व कृषी उत्पन्न बाजार समितीचे माजी संचालक बी. डी. भोपळे, राजू पाटील, मानसिंग दबडे, अशोक वारके करीत आहेत.
विशेष म्हणजे राज्यात महाविकास आघाडीच्या माध्यमातून शिवसेना, काँग्रेस, राष्ट्रवादी अशी आघाडी झाली असली तरी खानापूर ग्रामपंचायतीत थोडासा विरोधाभास असणारी आघाडी अस्तित्वात येण्याची शक्यता आहे. मागील पंचवार्षिक निवडणुकीत आमदार चंद्रकांत पाटील यांचीच सत्ता होती, यावेळी आमदार प्रकाश आबिटकर गटाने सत्ता खेचून घेण्यासाठी कंबर कसली असून, आमदार पाटील विरुद्ध आमदार आबिटकर असे रणांगण तापणार आहे. दिवसेंदिवस वातावरण तप्त असून संमिश्र प्रतिसाद मिळण्याचे संकेत आहेत.