अब्दुललाट : शिरदवाड (ता. शिरोळ) येथील ग्रामपंचायतीच्या निवडणुकीसाठी शिरदवाड स्वाभिमानी ग्रामविकास आघाडी विरुद्ध दत्ताजीराव कदम अण्णा स्वाभिमानी ग्रामविकास आघाडी अशी लढत होत आहे. काही प्रभागांत बहुजन वंचित आघाडीच्या उमेदवारांनी प्रस्थापितांना आव्हान दिले आहे.
प्रभाग क्रमांक १ मधील अंजना तानाजी मगदूम या बिनविरोध निवडून आल्या आहेत. मतदारसंख्या चार हजार ७३८ एवढी, तर प्रभाग संख्या ५ असून १५ जागा आहेत. निवडणुकीची तारीख जाहीर झाल्यापासून गावातील सर्व पुढारी एकत्र येऊन ग्रामपंचायत बिनविरोधबाबत चर्चा झाली; पण तारीख जवळ येऊ लागली, तसा बिनविरोधच्या भूमिकेला सुरूंग लागला आणि दोन गट अस्तित्वात आले. प्रभाग ४ व ५ मध्ये वंचित बहुजन आघाडीचे काही उमेदवार पूर्ण ताकदीनिशी उभे आहेत.
गतवेळच्या निवडणुकीत एकमेकाला पाण्यात पाहणारे नेते यंदा एकत्र आले आहेत. शिरदवाड स्वाभिमानी ग्रामविकास आघाडीने प्रचाराचा नारळ बौद्धवाड्यातून, तर दत्ताजीराव कदमअण्णा स्वाभिमानी ग्रामविकास आघाडीने कदमअण्णांच्या पुतळ्याला पुष्पहार घालून प्रचार दौरा सुरू केला.