कोल्हापूर : महाराष्ट्रातील सर्वच जिल्ह्यांमध्ये ड्राय रन घेण्याचा निर्णय सार्वजनिक आरोग्य विभागाने घेतला आहे. यासाठी ७ जानेवारी (गुरुवार) हा दिवस निश्चित करण्यात येणार आहे. याबाबत राज्यात सर्व वरिष्ठ आरोग्य अधिकाऱ्यांची बुधवारी दुपारी ४ वाजता व्हीसीव्दारे बैठक होणार असून, यामध्ये हा तपशील ठरवला जाईल.
कोरोना प्रतिबंधक लस देण्याची पूर्वतयारी नेमकी कशी झाली आहे, याची चाचणी घेण्यासाठी ड्राय रनचे आयोजन करण्यात येते. २ जानेवारी रोजी राज्यातील चार मोठ्या शहरांमध्ये याचे आयोजन करण्यात आले होते. मात्र केवळ चार शहरांमधील नियोजनावर अवलंबून न राहता सर्व जिल्ह्यांमध्ये नेमकी काय तयारी झाली आहे, याची खातरजमा करण्यासाठी सर्वत्र ड्राय रन घेण्याचा निर्णय घेण्यात आला आहे.
याचा संपूर्ण तपशील बुधवारी व्हीसीव्दारे होणाऱ्या बैठकीत निश्चित करण्यात येणार आहे. ड्राय रन केवळ जिल्हा पातळीवर घ्यायची आहे की तालुका पातळीवर याचा निर्णय अजून झाला नसल्याचे सांगण्यात आले. परंतु याची तयारी आरोग्य विभागाने केली असून, वरिष्ठांकडून येणाऱ्या सूचनांनुसार याचे नियोजन करण्यात येणार आहे.
चौकट
ड्राय रन म्हणजे काय
प्रत्यक्ष लस न देता केवळ ही प्रक्रिया कशी असेल, याचे प्रात्यक्षिक घेतले जाईल.
ठराविकजणांना ठरलेल्या वेळेत बोलावण्यात येईल.
आधार कार्डच्या आधारे त्यांची ओळख पटवली जाईल.
ओळख पटल्यानंतर डमी पाेर्टलवर त्यांची नोंद केली जाईल.
लस देण्याच्या कक्षामध्ये त्यांना पाठवले जाईल.
लस देण्यात आल्याची नोंद केली जाईल.
पुढील ३० मिनिटे त्यांना निरीक्षणाखाली आरोग्य कक्षात बसवले जाईल.
चौकट
ड्राय रनचा फायदा काय
प्रत्यक्षात लसीकरणावेळी काय अडचणी उद्भवू शकतात, हे या ड्राय रनमुळे कळणार आहे. लसीकरणावेळी धावपळ होऊ नये यासाठीची ही रंगीत तालीम असून, केवळ नोंदवलेल्या व्यक्तींनाच लस देण्यात येणार आहे. या प्रक्रियेत कोणतीही कसूर राहू नये, यासाठी ड्राय रन प्रक्रिया राबवण्यात येणार आहे.