डॉ. मेधा मेहंदळे : पर्यटन उद्योगाला मिळणार चालना

आडेत उभं राहतंय विवेकानंद स्मारक

गुहागर : दापोली तालुक्यातील आडे येथे कन्याकुमारी येथील स्वामी विवेकानंद स्मारकाची प्रतिकृती उभी राहत आहे. कोकणातील माणसांना विवेकानंद स्मारक पाहता यावे, त्यांच्या विचारांचा प्रसार व्हावा, अशी आईची इच्छा पूर्ण करण्यासाठी डॉ. मेधा मेहंदळेनी ही इमारत उभी केली आहे. विवेकानंद स्मारकामुळे आडे येथे पर्यटन व्यवसाय देखील वाढणार आहे. दापोली तालुक्यातील आडे हे गाव पर्यटनदृष्ट्या विकसीत आहे. तेथे डॉ. मेधा मेहंदळे या विवेकानंद स्मारक उभारत आहेत. या स्मारकाचे वैशिष्ट्य म्हणजे स्मारकाचे संपूर्ण बांधकाम कोकणातील पाऊस, दमट हवामान आणि वाळवीपासून सुरक्षित राहिल, अशी प्रक्रिया केलेल्या लाकडामध्ये होत आहे. स्मारकामध्ये कन्याकुमारी देवीची मूर्ती व विवेकानंदांचा सात फुटी ब्राँझचा पुतळा बसविण्यात येणार आहे. वडील सीताराम गणेश देसाई हे मुंबईतील रुपारेल आणि मिठीबाई महाविद्यालयात संस्कृत विभागप्रमुख होते. तसेच मुबंई विद्यापीठाचे पीएच. डी.चे मार्गदर्शक होते. मुद्गल पुराणासह अनेक संस्कृत ग्रंथाचा, ऋचांचा मराठी भाषेत ओवीबध्द रुपांतर सीताराम देसाई यांनी केले आहे. दैनंदिन साईबोध, दैनंदिन दासबोध, देवी महात्म्य, सुभाषित मधुघट ग्रंथ, सुबोध कथा, अष्टविनायक महात्म्य अशी पुस्तके त्यांनी लिहिली आहेत. ‘तिळा दार उघड’ या त्यांच्या पुस्तकाला युनेस्को पुरस्कार मिळाला आहे. या स्मारकाबद्दल बोलताना डॉ. मेधा मेहंदळे म्हणाल्या की, कोकणातील वयस्कर लोकांना कन्याकुमारीपर्यंत जाणं शक्य होत नाही. त्यासाठी कोकणात विवेकानंदाचे स्मारक बांधून त्याच्या कार्याचा प्रसार करावा. विवेकानंदानी सांगितलेलं विश्वबंधुत्वाचं तत्वज्ञान जनसामान्यांना कळावे आणि या ज्ञान मंदिरातून प्रगत भारत घडावा, अशी माझी आई कुसुम देसाई हिची इच्छा होती. हे स्मारक इंदापूरचे विक्रांत सप्रे बांधत आहेत. स्मारकातील स्वामी विवेकानंद आणि डॉ. सी. ग. देसाई यांच्या पुतळ्यांचे काम सुप्रसिध्द शिल्पकार जयेंद्र व जयप्रकाश शिरगावकर करत आहेत. स्मारकगृहाचे रेखांकन सुप्रसिध्द चित्रकार चंद्रशेखर संत यांनी केले आहे. यांच्यासारखी दिग्गज मंडळी आणि आडे ग्रामस्थांच्या मदतीमुळेच हे शक्य झाल्याचे त्यांनी सांगितले. पुस्तक प्रदर्शन या स्मारकाचे उद्घाटन १४ एप्रिल रोजी होणार असून, त्यानिमित्त विविध सांस्कृतिक कार्यक्रमांचे आयोजन करण्यात आले आहे. तसेच १३ व १४ एप्रिल रोजी विवेकानंद केंद्राच्यावतीने पुस्तक प्रदर्शन आणि विक्री केंद्र आडे येथे सुरू राहणार आहे.