कोल्हापूर : दिलबहार तालीम मंडळ (अ)ने चुरशीच्या सामन्यात बालगोपाल तालीम मंडळावर ३-१ अशी मात करीत दसरा कप फुटबॉल स्पर्धेची अंतिम फेरी गाठली. छत्रपती शाहू स्टेडियम येथे सोमवारी दिलबहार (अ) विरुद्ध बालगोपाल तालीम मंडळ यांच्यात उपांत्य फेरीतील सामना झाला. १९ व्या मिनिटास दिलबहार(अ)च्या करण चव्हाण-बंदरेने सचिन पाटीलच्या पासवर गोल करीत १-० अशी आघाडी निर्माण केली. एका गोलच्या दबावात बालगोपालच्या सततच्या आक्रमणामुळे ३९ व्या मिनिटास ऋतुराज पाटीलच्या पासवर रोहित कुरणे यास गोल करण्यात यश आले. त्यामुळे सामन्यात बालगोपाल संघाने १-१ अशी बरोबरी साधली. उत्तरार्धात दिलबहार संघाकडून गणेश दाते, सचिन पाटील, जावेद जमादार, सणी सणगर, करण चव्हाण-बंदरे, माणिक पाटील यांनी आक्रमक खेळ करण्यास प्रारंभ केला. ४८ व्या मिनिटास सचिन पाटीलच्या पासवर जावेद जमादारने उत्कृष्ट गोलची नोंद करीत सामन्यात २-१ अशी आघाडी आपल्या संघास मिळवून दिली. या आघाडीमुळे बालगोपाल संघाने गोल फेडण्यापेक्षा बचावावर भर दिला. दिलबहार संघाच्या जावेद जमादारने मोठ्या डी बाहेरून मिळालेल्या फ्री कीकवर मारलेला फटका बालगोपालचा गोलरक्षक नीलेश भोई याने अत्यंत चपळाईने बाहेर काढला. ९० व्या मिनिटास दिलबहारच्या करण चव्हाण-बंदरेने अनिकेत जाधवच्या पासवर उत्कृष्ट मैदानी गोलची नोंद करीत संघास ३-१ अशी आघाडी मिळवून दिली. हीच आघाडी कायम ठेवत दिलबहार (अ)ने दसरा कप स्पर्धेच्या अंतिम फेरीत धडक मारली.आजचा सामना दु. ४ वा. फुलेवाडी विरुद्ध शिवाजी तरुण मंडळ कोल्हापुरातील शाहू स्टेडियम येथे सुरू असलेल्या दसरा कप फुटबॉल स्पर्धेत सोमवारी दिलबहार (अ) व बालगोपाल तालीम मंडळ यांच्यात झालेल्या सामन्यातील एक चुरशीचा क्षण.
‘दिलबहार (अ)’ अंतिम फेरीत
By admin | Updated: March 31, 2015 00:36 IST