इचलकरंजी : मोटारसायकलीवरून ‘धूम’ स्टाईलने चोरी करून जिल्ह्यात थैमान घालणार्या चोरट्यांच्या टोळीला, चोरीचे सोने विकत घेणार्या सोनारासह चौघांना येथील गुन्हे अन्वेषण शाखेच्या पथकाने अटक केली आहे. त्यांच्याकडून साडेसात तोळे सोने व दोन मोटारसायकली असा तीन लाख २० हजार ८०० रुपयांचा मुद्देमाल जप्त केला आहे. या टोळीतील आणखी दोघेजण फरार असल्याचेही पथकाचे प्रमुख मानसिंग खोचे यांनी सांगितले. सतीश विश्वास जोगदंडे (वय २६), संदीप चंद्रकांत सोनवणे (२१, दोघे रा. पेठवडगाव), सूरज मच्छिंद्र कोळी (१९, रा. लाटवडे) अशी अटक केलेल्या तिघा संशयित चोरट्यांची नावे आहेत; तर गणेश रतन नवळे व प्रदीप चंद्रकांत सोनवणे हे त्यांचे दोन साथीदार फरार आहेत. या टोळीतील चोरट्यांकडून चोरीचे सोने विकत घेणारा सोनार अशोक शांतिलाल राठोड (४०, रा. पेठवडगाव) यालाही पोलिसांनी अटक केली आहे. याबाबत पोलिसांतून मिळालेली माहिती अशी, शिरोळ तालुक्यातील उदगाव बसस्थानक परिसरात संशयितरीत्या फिरताना सतीश जोगदंडे हा पोलिसांना आढळला. पेठवडगावमधील जैन मंदिरात झालेल्या चोरीतील मुख्य संशयित म्हणून जोगदंडे याचे नाव पुढे आले असून, तो फरार होता. पोलिसांनी त्याला ताब्यात घेतले, तर जयसिंगपूर येथील क्रांती चौक परिसरात सूरज व संदीप हे दोघे संशयितरीत्या फिरताना मिळून आले. पोलिसांनी तिघांनाही अटक करून त्यांच्याकडे चौकशी सुरू केली. तपासामध्ये कोल्हापूर जिल्ह्यातील हुपरी, हातकणंगले, जयसिंगपूर अशा पाच ठिकाणी ‘धूम’ स्टाईलने सोन्याचे दागिने चोरल्याचे त्यांनी कबूल केले. त्याचबरोबर कºहाड, सातारा, सांगली, विजापूर या परिसरात सोळा गुन्हे असे एकूण २१ गुन्हे केल्याचे चोरट्यांनी प्राथमिक तपासात कबूल केले आहे. पोलिसांनी त्यांच्याकडून साडेसात तोळे वजनाचे दागिने व एमएच ०९ डीडी २४८१, एमएच ०९ व्हीएल ३८४८ अशा दोन मोटारसायकली असा एकूण तीन लाख २० हजार ८०० रुपयांचा मुद्देमाल जप्त केला आहे. ही कारवाई इचलकरंजीत गुन्हे अन्वेषण पथकातील कर्मचारी संतोष शेळके, राजू नलवडे, इम्रान सनदी, विजय तळसकर, आदींनी केली आहे. (प्रतिनिधी)
‘धूम’ स्टाईलने चोरी करणार्या टोळीसह सराफ अटक
By admin | Updated: May 22, 2014 01:09 IST