मुंबईच्या प्रदर्शनात ‘कोल्हापुरी’ला मागणी

महालक्ष्मी सरस प्रदर्शन : जिल्ह्यातील बारा महिला बचत गट सहभागी होणार

कोल्हापूर : मुंबई येथे होणाऱ्या महालक्ष्मी सरस प्रदर्शनामध्ये कोल्हापूर जिल्ह्यातील १२ महिला बचत गट सहभागी होणार आहेत. आतापर्यंतच्या सर्वच प्रदर्शनांमध्ये कोल्हापुरी खाद्यपदार्थांना मोठ्या प्रमाणावर मागणी असल्याचे दिसून आले आहे. मुंबईतील म्हाडा कॉम्प्लेक्स वांद्रे येथे ११ ते २३ जानेवारी दरम्यान हे प्रदर्शन भरणार असून, प्रत्येक गटाच्या दोन, याप्रमाणे २४ महिला सहभागी होतील. या महिलांना येण्या-जाण्याचे भाडे शासनाच्यावतीने देण्यात येते. येथे स्टॉल मोफत असून महिलांच्या निवासाचीही व्यवस्था करण्यात येते. दहा-बारा दिवस राहणे शक्य नसेल तर बचत गटांच्या उर्वरित महिलांनाही सहभागी करून घेतले जाते. कोल्हापूर जिल्ह्णातील जयभवानी (पणुंद्रे, ता. शाहूवाडी), भूमी (कसबा वाळवे, ता. राधानगरी), महालक्ष्मी, जय मातादी (हुपरी), कल्याणी (भादोले, ता. हातकणंगले), पंचगंगा (वळिवडे), भोगावती, तुळशी (खुपिरे), सिद्धार्थ (उचगाव, ता. करवीर), उमेद (औरवाड, ता. शिरोळ), गुरूदत्त (कोतोली), श्री गणेश (वाघवे, ता. पन्हाळा) हे बचत गट सहभागी होणार आहेत. (प्रतिनिधी) दिल्लीपासून ते कोल्हापूरपर्यंतच्या अनेक प्रदर्शनांमध्ये कोल्हापुरी खाद्यपदार्थांना मोठी मागणी असते. कोल्हापुरी तांबडा, पांढरा रस्सा, गूळ, चटण्या, मसाले, हुपरीचे चांदीचे दागिने, कोल्हापुरी चप्पल, यासाठी नागरिक कोल्हापूरच्या बचत गटांच्या स्टॉलसमोर गर्दी करतात. पुणे, मुंबई येथे तर मूळचे कोल्हापूर परिसरातील अनेकजण या स्टॉलवर येत असल्याचे चित्र गेली अनेक वर्षे दिसून येत आहे. बचत गटांच्या महिलाही आता जागरूक झाल्या असून, त्यांचे व्यवसाय व्यवस्थापन अतिशय नेटके असल्याचा अनुभव आम्ही घेत असतो. - डॉ. हरीष जगताप, प्रकल्प संचालक, कोल्हापूर जिल्हा ग्रामीण विकास यंत्रणा.