केंद्राच्या ग्रामीण मंत्रालयाकडून राज्यातील दोन पंचायत समित्यांना हा पुरस्कार प्राप्त झाला आहे. त्यामध्ये गडहिंग्लज पंचायत समितीचा समावेश असून अहमदनगर जिल्ह्यातील 'राहाता' पंचायत समितीलाही हा पुरस्कार मिळाला आहे. केंद्र शासनाकडून २५ लाखांचे बक्षीस व सन्मानपत्र देण्यात येणार आहे.
राज्यस्तरावरील कोकण विभागीय कमिटीतर्फे गडहिंग्लज पंचायत समितीच्या कामांची पाहणी करण्यात आली. केंद्र व राज्य शासनाच्या विविध योजनांची अंमलबजावणी, रोजगार हमी योजना, समाजकल्याण, स्वच्छता अभियान, आरोग्य विभागाकडील योजना, राष्ट्रीय पेयजल, आदींसह सर्व विभागांकडील राबविलेल्या योजनांची पाहणी करून मूल्यांकन करण्यात आले.
यापूर्वी गडहिंग्लज पंचायत समितीने राज्यस्तरावरील 'यशवंत पंचायत राज' पुरस्कार मिळवून राज्याला आदर्श देणारे काम केले आहे. केंद्राकडून मिळालेल्या या पुरस्कारामुळे पंचायत समितीच्या यशाच्या शिरपेचात आणखी एक मानाचा तुरा खोवला गेला आहे.
या कामी सभापती रूपाली कांबळे, उपसभापती इराप्पा हसुरी यांच्यासह सदस्य, गटविकास अधिकारी शरद मगर, खातेप्रमुख व कर्मचारी यांनी विशेष परिश्रम घेतले.
--
मंत्रिमहोदयांचे सहकार्य, लोकप्रतिनिधी, पदाधिकारी व सदस्यांच्या सक्रिय सहभागामुळे शासनाच्या योजनांची अंमलबजावणी सहजपणे करता आली. आपण केलेल्या कामांचे सादरीकरण उत्तमरीत्या करता आले. सर्वांच्या सहभागातून हा पुरस्कार प्राप्त झाला आहे.
- शरद मगर, गटविकास अधिकारी, गडहिंग्लज पंचायत समिती.
---------------------------------
* गडहिंग्लज पंचायत समिती : ०१०४२०२१-गड-०९