कोल्हापूर : बदललेले वातावरण पाहता संततधार पावसाचे दिवस आता सरले असून, येथून पुढे वादळी पावसावरच मदार राहणार आहे. याला अपवाद फक्त सोमवारपासून सुरू होणाऱ्या हस्त नक्षत्राचा राहील; पण तो पाऊस ढग उतरेल तिथेच पडेल, असा अंदाज आहे. त्यामुळे आता कमी दाबाचा पट्टा तयार झाला तरच सलग दोन-तीन दिवस पडेल, अन्यथा ऑक्टोबर हिट व गडगडाटी पावसाची सवय करून घ्यावी लागणार आहे.
यावर्षी संपूर्ण एप्रिल व मे महिन्यात वळवाच्या पावसाने जिल्ह्याला झोडपले. जूनमध्ये अशाच पावसामुळे पुराची परिस्थिती तयार होता होता निवळली. त्यानंतर जुलैच्या तिसऱ्या आठवड्यापर्यंत उन्हाचे चटके बसवणाऱ्या पावसाने त्यानंतर मात्र अवघ्या चार-पाच दिवसांत प्रलयकारी महापूरच आणला. पाऊस थांबल्याने महापूर वेगाने ओसरला, पण ही उघडीप वाढतच गेली. अधूनमधून तुरळक सरी पडत राहिल्या, पण त्याला म्हणावा तसा जोर राहिला नाही. पावसाची सर्व नक्षत्रे संपली तरी महापूर येण्याआधी पडला तसा संततधार पाऊस जिल्ह्यात पडलाच नाही. बदललेल्या ऋतुमानाचा हा खेळ बघतच पिकांची काढणी, मळणी सुरू झाली. सुरुवातीला हवीहवीशी वाटणारी उघडीप मात्र आता चिंतेत बदलली आहे. उत्तरा नक्षत्र चांगले बरसेल अशी आशा होती, पण आता नक्षत्र संपण्यास तीन दिवस उरले तरी मोठा पाऊस झाला नाही. ढग भरून येत आहेत, पण अगदीच तुरळक पाऊस पडत आहे. पुन्हा उन्हाचा तडाखा सहन करावा लागत आहे.
आता सोमवारपासून हस्त नक्षत्र सुरू होत आहे. या नक्षत्रात चांगला पाऊस पडतो, शिवाय हा मुरवणीचा पाऊस असल्याने भूजल साठ्यात वाढ होण्यासाठी पाऊस आवश्यक असतो. पण यावर्षी हा पाऊस देखील हुलकावणी देईल असा पारंपरिक अंदाज आहे. तर हवामान खात्याने दिलेल्या अंदाजानुसार आज शुक्रवारपासून चार दिवस तुरळक का असेना; पण पावसाचे राहणार आहेत. पुन्हा पाऊस ओढ घेईल आणि ऑक्टोबरच्या पहिल्या आठवड्यात पुनरागमन करेल, पण हा पाऊस देखील सततचा असणार नाही. तर ढग उतरेल तेथे वादळासारखा हा पाऊस पडणार आहे. बंगालच्या उपसागरात कमी दाबाचा पट्टा सक्रिय झाला आह. तो मध्य भारताच्या दिशेने सरकला तर मात्र पावसाचा मुक्काम वाढणार आहे. तथापि गुजरातच्या दिशेने वारे जोरात सरकत असल्याने पाऊस हुलकावणी देईल असा अंदाज आहे.