कोल्हापूर : सिमेंट कंपन्यांनी प्रती पोत्यामागे ७० ते ८० रुपयांची केलेली दरवाढ अन्यायकारक आहे. त्यामुळे बांधकाम तसेच घरांच्या किमतीत वाढ होणार आहे. त्यामुळे सिमेंटची दरवाढ मागे घेण्याबाबत शासनाने लक्ष द्यावे, या मागणीचे निवेदन ‘क्रिडाई’ कोल्हापूरतर्फे निवासी उपजिल्हाधिकारी संजय पवार यांना देण्यात आले. निवेदनात असे म्हटले आहे की, सिमेंट उत्पादन करणाऱ्या विविध कंपन्यांनी केलेल्या दरवाढीमुळे २२५ ते २५० रुपयांपर्यंत असलेल्या सिमेंट पोत्यांची किंमत ३१० ते ३६० रुपये इतकी झाली आहे. ही दरवाढ कृत्रिम स्वरूपातील आहे. त्याचा फटका बांधकाम व्यावसायिक, ठेकेदार, स्वमालकीचे घर बांधणाऱ्यांना बसणार आहे. यामुळे बांधकामाची किंमत प्रती चौरस फूट ६० ते ७० रुपयांनी वाढणार आहे. शासनाने या सिमेंट कंपन्यांच्या नफेखोरीस आळा न घातल्यास या दरवाढीमुळे सर्वसामान्यांना घर बांधणे आणि बांधकाम व्यावसायिकांना योग्य दरामध्ये घरांचा पुरवठा करणे अशक्य होणार आहे. त्यामुळे अन्यायकारक दरवाढ मागे घेण्याबाबत शासनाने लक्ष द्यावे. या कृत्रिम दरवाढीचा ‘क्रिडाई’च्या माध्यमातून बांधकाम व्यावसायिक तीव्र निषेध करत आहेत. शासनाने याबाबत सकारात्मक विचार न केल्यास सर्व बांधकाम व्यावसायिकांकडून कामबंद आंदोलन करण्यात येईल. या शिष्टमंडळात क्रिडाई कोल्हापूरचे अध्यक्ष गिरीश रायबागे, दिलीप जाधव, नितीन जिरगे, राजीव परीख, महेश यादव, हेमांग शहा, विलास रेडेकर, चेतन चव्हाण, संदीप मिरजकर, पारस ओसवाल, विद्यानंद बेडेकर, आदींचा समावेश होता. (प्रतिनिधी)
कामबंदचा ‘क्रिडाई’चा इशारा; निवासी उपजिल्हाधिकाऱ्यांना दिले निवेदन
By admin | Updated: July 18, 2014 00:56 IST