लोकमत न्यूज नेटवर्क
कोल्हापूर : मोसम (ता. शाहूवाडी) येथील ज्ञानेश्वर सहकारी दूध संस्थेच्या लेखापरीक्षणासाठी आवश्यक असणारे दफ्तर न दिल्याने सचिव सुभाष सीताराम वायकुळ (रा. मोसम) यांच्यावर लेखापरीक्षक उदयसिंह रावराणे यांनी शाहूवाडी पाेलीस ठाण्यात फौजदारी गुन्हा दाखल केला आहे.
ज्ञानेश्वर दूध संस्थेचे एप्रिल २०१५ ते मार्च २०१८ या कालावधीतील लेखापरीक्षण प्रलंबित हाेते. लेखापरीक्षणाबाबत आवश्यक ती कागदपत्रे सचिव सुभाष वायकुळ देत नाहीत, त्यांनी या कालावधीत अपहार केल्याबाबत संस्थेचे अध्यक्ष लक्ष्मण सोष्टे यांनी लेखापरीक्षण विभागाकडे तक्रार दिली होती. त्यानुसार या कालावधीतील दफ्तर उपलब्ध करुन देण्याबाबत संस्थेचे अध्यक्ष सोष्टे व सचिव वायकुळ यांना नोटीस दिली होती. दफ्तर एकमेकांच्या ताब्यात असल्याच्या सबबीखाली सादर केलेले नाही, त्यामुळे एप्रिल २०१५ ते मार्च २०१८ या कालावधीतील दफ्तर उपलब्ध नसल्याने लेखापरीक्षण करता येत नसल्याचे लेखापरीक्षक उदयसिंह रावराणे यांनी सहाय्यक निबंधक (दुग्ध) कोल्हापूर यांना कळविले होते. सहाय्यक निबंधकांनी दफ्तर ताब्यात घेण्याबाबत शाहूवाडी तहसीलदारांना कळविले होते. तहसीलदार कार्यालयाकडून शाहूवाडी पोलिसांना कारवाईचे आदेश देण्यात आले. त्यानुसार पोलिसांनी ३ ऑगस्ट २०२१ रोजी कारवाई केली, मात्र अपेक्षित दफ्तर सापडले नाही. यावेळी चौकशीअंती दफ्तर अध्यक्ष सोष्टे यांच्याकडे दिल्याचे सचिव वायकुळ यांनी सांगितले. मात्र, अध्यक्षांकडे कोणतेही दफ्तर अथवा दफ्तर प्राप्तची पाेहोच सादर केलेली नसल्याचे निदर्शनास आले. त्यामुळे संस्थेचे दफ्तर सांभाळण्याची जबाबदारी कायद्याने सचिवाची असते. सभासदांनी विश्वासाने सोपवलेल्या संस्था दफ्तराचा अपहार करुन त्याची विल्हेवाट लावल्याबद्दल सुभाष वायकुळ यांच्यावर लेखापरीक्षक उदयसिंह रावराणे यांनी फौजदारी गुन्हा दाखल केला आहे.