कोल्हापूर : ‘कोरोना’ रुग्ण असल्याची धास्ती सर्वसामान्यांत दिवसेंदिवस वाढत आहे. कळंबा मार्गावर बापूराम नगरात एका युवकास कोरोनाचा संसर्ग झाल्याच्या संशयामुळे परिसरात खळबळ माजली.
शेजाऱ्यांनी सीपीआर रुग्णालयास फोन करून त्याची माहिती दिली; पण तपासणीअंती त्याच्यात ‘कोरोना’ संसर्गाची कोणतीही लक्षणे नसल्याचे आढळल्याने अनेकांनी सुस्कारा सोडला.बापूरामनगरमध्ये एका युवकास सर्दी व खोकला झाल्यामुळे चार दिवसांपूर्वी त्याच्यावर सीपीआर रुग्णालयात उपचार करण्यात येऊन त्याला घरी सोडून दिले; पण त्याच्या घरातील शेजाऱ्यांनी त्याला ‘कोरोना’ झाल्याची धास्ती घेतली.
शेजाऱ्यांनी तातडीने ‘सीपीआर’मधील ‘कोरोना’ कक्षाशी संपर्क साधला. त्याला नेण्यासाठी ‘सीपीआर’ची रुग्णवाहिका तातडीने त्याच्या घरी पोहोचली; त्यामुळे ‘कोरोना’ची अफवा भागात पसरली व खळबळ माजली.
त्या रुग्णास तातडीने सीपीआर रुग्णालयात आणून तपासणी केली; पण त्याच्यामध्ये ‘कोरोना’ संसर्गाची कोणतीही लक्षणे आढळून आली नसल्याचे वैद्यकीय अधिकाऱ्यांनी सांगितले; त्यामुळे परिसरातील लोकांनी निश्वास सोडला; मात्र ‘कोरोना’ची अफवा वाढतच राहिली.