कोल्हापूर : ‘खूब जमेगा रंग... जब मिलेंगे तीन यार... दाभोलकर, पानसरे आता खेडेकर...’ अशी वादग्रस्त पोस्ट ‘फेसबुक’वर टाकणाऱ्या औरंगाबाद येथील संशयित अमोल पाटील या तरुणास मंगळवारी रात्री कोल्हापूर पोलिसांनी चौकशीसाठी ताब्यात घेतल्याचे सूत्रांनी सांगितले. दरम्यान, पानसरेंच्या हत्येनंतर पोलिसांना शहरात पाच संशयास्पद मोटारसायकली मिळाल्या. त्या चोरीच्या असून त्या कोणत्या परिसरातून चोरीस गेल्या, त्या परिसरातील सीसीटीव्हीचे फुटेज पोलीस मिळविण्याचा प्रयत्न करत आहेत. मारेकरी हे कोल्हापूर, सांगली व कर्नाटकातील असण्याचा कयास पोलिसांचा असून, त्यादृष्टीने पोलीस शोध घेत आहेत. ज्येष्ठ कामगार नेते गोविंद पानसरे यांच्या हत्येनंतर पाटील याने ‘फेसबुक’वर ‘दाभोलकर, पानसरे आता खेडेकर, दाभोलकरांचे रेकॉर्ड मोडून पानसरे सर्वांत पुढे’ अशी वादग्रस्त पोस्ट टाकल्याने राज्यभर खळबळ उडाली होती. या प्रकरणी औरंगाबाद पोलिसांनी पाटीलला ताब्यात घेऊन कोल्हापूर पोलिसांच्या ताब्यात दिले. त्याच्याकडे पोलीस अधीक्षक डॉ. मनोजकुमार शर्मा, अप्पर पोलीस अधीक्षक अंकित गोयल यांनी कसून चौकशी केली. अशा पद्धतीची पोस्ट का टाकली, त्यामध्ये तुझा काय हेतू होता. दाभोलकरनंतर पानसरे यांची हत्या होणार हे तुला माहीत होते का? आदी प्रश्न विचारले. तसेच त्याच्या मोबाईलचे कॉल डिटेल्सही तपासण्यात येत असून, त्याच्या संपूर्ण वैयक्तिक जीवनाची माहिती घेण्याचे काम सुरू असल्याचे सूत्रांनी सांगितले. चौकशीमध्ये त्याने दिलेली माहिती गोपनीय ठेवण्यात आली आहे. त्याला विशेष पोलीस महानिरीक्षकांसमोरही उभे करण्यात आले होते. दरम्यान, अप्पर पोलीस अधीक्षक गोयल यांनी अॅस्टर आधार हॉस्पिटलमध्ये जखमी उमा पानसरे यांच्या प्रकृतीची विचापूस केली. डॉक्टरांच्या परवानगीनुसार त्यांच्याकडे मारेकऱ्यांनी कोणत्या रंगाची दुचाकी वापरली होती, याबाबत माहिती घेण्याचा प्रयत्न केला असता त्यांनी रंग काळा की पांढरा हे आठवत नसल्याचे सांगितले. त्या अजूनही धक्क्यातून सावरल्या नसल्याचे सूत्रांनी सांगितले. तपास पथकांकडून रोज माहिती घेण्याचे काम पोलीस अधीक्षक डॉ. शर्मा करत आहेत. अद्यापही पोलिसांना कोणताही ठोस पुरावा मिळालेला नाही परंतु हाती येणाऱ्या संशयास्पद माहितीची पोलीस अत्यंत बारकाईने खातरजमा करत आहेत. (प्रतिनिधी)
‘फेसबुक’वर वादग्रस्त पोस्ट; तरुणास अटक
By admin | Updated: February 26, 2015 00:53 IST