: निपाणी देवगड राज्य महामार्गावरील सोळांकुर (ता. राधानगरी) येथे पाईप घेऊन चाललेल्या कंटेनरची मोटारसायकलीस धडक बसल्याने ट्रकखाली चिरडून शारदा शंकर पाटील (वय ५५, रा. सोळांकुर) यांचा मृत्यू झाला. मोटारसायकलस्वार शंकर शामराव पाटील हे जखमी झाले आहेत. या घटनेची नोंद राधानगरी पोलीस ठाण्यात झाली आहे. घटनेनंतर हजारोंच्या संख्येने लोक जमा झाले होते. तब्बल सहा तास रास्ता रोको करण्यात आला.
गावातील मुख्य रस्त्याचे काम अनेक वर्षे रखडले असून, ते त्वरित होण्यासाठी तसेच थेट पाईपलाईन गावाच्या बाहेरून डोंगरातून जाण्यासाठी ग्रामस्थांनी हा रास्ता रोको केला. शनिवारी सकाळी साडेअकराच्यासुमारास शारदा पाटील व पती निवृत्त वनक्षेत्रपाल शंकर पाटील हे दोघे मोटारसायकलीवरून मोघर्डे ओढ्याजवळ तांबर शेताकडे जात होते. ग्रामपंचायत सांस्कृतिक सभागृहासमोर मोटारसायकलीला पाईपलाईनची वाहतूक करणाऱ्या कंटेनरने ठोकल्याने त्या रस्त्यावर पडल्या. कटेनरचे मागील चाक त्यांच्या डोक्यावरून गेल्याने त्या जागीच ठार झाल्या. अपघातानंतर चालक पळून गेला. पाटील यांच्या पाठीमागे पती, विवाहित मुलगी, मुलगा असा परिवार आहे. पाटील यांच्या मृतदेहाचे शवविच्छेदन सोळांकुर ग्रामीण रुग्णालयात करण्यात आले. गावातील सर्व व्यवहार बंद ठेवण्यात आले होते.
निपाणी-देवगड रस्त्यावरील गावातील मुख्य रस्त्याचे काम रखडले आहे. त्यामुळे या रस्त्यावरून जीवघेणा प्रवास करावा लागतो . धुळीचा मोठया प्रमाणात त्रास होतो. या रस्त्याच्या कामासाठी अनेक आंदोलने झाली तरीही ठेकेदाराने कामाकडे दुर्लक्ष केले आहे. लोकांनी निपाणी-देवगड रस्त्यावर ट्रॅक्टर आडवा लावून रास्ता रोको केला. थेट पाईपची जलवाहिनी गावाच्या बाहेरून घ्यावी तसेच मुख्य रस्त्याचे काम ताबडतोब सुरू करावे, या मागणीसाठी सुमारे सहा तास रस्ता अडविण्यात आला. सार्वजनिक बांधकाम विभागाचे अधिकारी, थेट पाईप व रस्त्याचे ठेकेदार यांच्यावर सदोष मनुष्यवधाचा गुन्हा नोंदवावा, अशीही मागणी ग्रामस्थांनी केली. पोलीस उपअधीक्षक आर. आर. पाटील, सहायक पोलीस निरीक्षक विश्वास पाटील, तहसीलदार मीना निंबाळकर, सार्वजनिक बांधकाम विभागाचे शाखा अभियंता अमित पाटील, महानगरपालिकेचे जल अभियंता हर्षजित घाडगे घटनास्थळी उपस्थित होते. पोलीस बंदोबस्त मोठ्या प्रमाणात होता. दोन लाखांची मदत संबंधित कंपनीने देण्याचे जाहीर केल्याचे आश्वासनानंतर रास्ता रोको मागे घेण्यात आला.
फोटो: ०३शारदा पाटील
०३ सोळांकुर घेराव
फोटो - सोळांकुर येथे अपघातातील मृतांच्या कुटुंबीयांना मदत मिळावी तसेच रस्त्याचे काम त्वरित व्हावे व थेट पाईपलाईन गावाबाहेरून घ्यावी, या मागणीसाठी अधिकाऱ्यांना घातलेला घेराव.