चंदगड : अवसायनात गेलेल्या चंदगड तालुका संघाने फिनिक्स पक्ष्याप्रमाणे भरारी घेत महाराष्ट्र शासनाचा ‘सहकार भूषण’ पुरस्कार मिळविला आहे. संघाची वार्षिक उलाढाल १०० कोटींच्या पुढे न्यायचा संकल्प आमदार राजेश पाटील यांनी व्यक्त केला. चंदगड तालुका शेतकरी खरेदी-विक्री संघातर्फे हलकर्णी फाटा येथे आयोजित ऑनलाईन सभेत ते अध्यक्षस्थानावरून बोलत होते.
आमदार पाटील म्हणाले, शेतकऱ्यांच्या मालकीची दौलत असावी, यासाठी नरसिंगराव पाटील यांनी आपले बलिदान दिले. 'दौलत'च स्वत:चे मूल समजत. तो दौलत कारखाना सभासद, शेतकऱ्यांच्या मालकीचा करणे, हेच नरसिंगरावांचे उचित स्मारक असून, त्यासाठी प्रामाणिकपणे प्रयत्न करण्याची गरज आहे.
संघाचे व्यवस्थापक एस. वाय. पाटील यांनी प्रास्ताविकात संघाची यशस्वी घोडदौड सुरू असून, १५ शाखांचे व्यवहार एक कोटीपेक्षा अधिक असल्याचे जाहीर केले.
चर्चेत अनिल सुरूतकर, बंडू चिगरे, भिकू गावडे, भीमराव चिमणे, महादेव प्रसादे, विष्णू पाटील यांनी भाग घेतला. प्रत्येक शाखेच्या ठिकाणी इमारत बांधावी, अशी सूचना भिकू गावडे यांनी मांडली. नरसिंगरावांच्या रेंगाळलेल्या स्मारकाबाबत विष्णू पाटील यांनी चिंता व्यक्त केली. कृषी प्रदर्शन भरविण्याची मौलिक सूचना झि. नि. पाटील यांनी मांडली.
उपाध्यक्ष पोमाणा पाटील यांनी आभार मानले. यावेळी विठोबा गावडे, अल्लीसो मुल्ला, परशराम पाटील, गोपाळ गावडे, पुंडलिक पाटील, अभय देसाई, राजीव जाधव, जानबा चौगुले, रामचंद्र बेनके, दयानंद पाटील, विजयमाला पाटील, नारायण पाटील आदींसह संंचालक उपस्थित होते.
१५ टक्के पगारवाढ
संघाच्या यशात सभासद शेतकऱ्यांप्रमाणेच कर्मचाऱ्यांचेही योगदान आहे. त्यामुळे त्याची जाणीव ठेवून कर्मचाऱ्यांना १५ टक्के पगारवाढ अध्यक्ष राजेश पाटील यांनी जाहीर केली.
फोटो ओळी : हलकर्णी फाटा (ता. चंदगड) येथे तालुका शेतकरी खरेदी-विक्री संघाच्या सभेत आमदार राजेश पाटील यांनी मार्गदर्शन केले.
क्रमांक : २६०३२०२१-गड-०१