संदीप बावचे
शिरोळ : ग्रामपंचायत निवडणुकीच्या अनुषंगाने मतदानादिवशी खबरदारी घेण्यासाठी निवडणूक आयोगाने गाईडलाईन दिली आहे. मतदान केंद्रांवरील रांगा, केंद्रावर बुथ अॅपचा वापर, मतदारांसाठी सॅनिटायझर, साबण अशी व्यवस्था केली जाणार आहे. यासाठी निवडणूक यंत्रणेकडून नियोजन सुरू असले तरी यंत्रणेची चांगलीच कसरत होणार आहे. नागरिकांशी थेट संबंध येणारी ग्रामपंचायत निवडणूक शासकीय यंत्रणेसमोर आव्हान ठरणारी आहे. कोरोनाचे नियम पाळून निवडणूक काळात प्रचार करण्याच्या सूचना आयोगाने दिल्या आहेत. त्यामुळे उमेदवारांवर अनेक बंधने आली आहेत. प्रचारासाठी पाचपेक्षा अधिक लोकांना परवानगी नसल्याने प्रचारावरही मर्यादा आली आहे. निवडणूक काळात फिजिकल डिस्टन्सिंगचे पालन व्हावे, यासाठी निवडणूक अधिकारी, कर्मचारी याबरोबरच मतदार व उमेदवारांनाही कोरोनाचे नियम पाळावे लागणार आहेत.
-----------------
नोटाचेही बटण दाबता येणार
लोकसभा, विधानसभा निवडणुकीप्रमाणेच ग्रामपंचायत निवडणुकीतसुद्धा मतदारांना मतपत्रिकेवरील एकाही उमेदवाराला मतदान करावयाचे नसल्यास नोटाचे बटण दाबता येणार आहे. इलेक्ट्रॉनिक मतदान यंत्रावर नोटा हा पर्याय उपलब्ध असल्यामुळे ज्या मतदारांना कोणत्याही उमेदवाराला मतदान करण्याची इच्छा नाही त्यांना मतदानाचा हक्क बजावता येणार आहे.
आरोग्य यंत्रणेची तयारी
प्रत्येक मतदान केंद्रावर एक ते दोन आरोग्य कर्मचाऱ्यांची नियुक्ती केली जाणार आहे. तपासणीसाठी थर्मल टेस्टिंग, ऑक्सिमीटर अशी यंत्रणा सज्ज ठेवली जाणार आहे. कोविडची लक्षणे दिसून आल्यास त्या मतदाराला तत्काळ स्वॅब तपासणीसाठी कोविड केंद्रावर पाठविले जाणार आहे. मतदानासाठी आरोग्य यंत्रणेने तयारी केली आहे.
शिरोळमध्ये २४५ मतदान केंद्रे
तालुक्यातील ३३ ग्रामपंचायतीच्या निवडणुकीसाठी २४५ मतदान केंद्रावर मतदानाची प्रक्रिया पार पाडली जाणार आहे. यासाठी १२८० कर्मचाऱ्यांच्या ३२० पथकांची नियुक्ती करण्यात आली आहे. मतदान यंत्रेही तालुका प्रशासनाकडे उपलब्ध झाली आहेत. संवेदनशील केंद्रांवर पोलीस यंत्रणेची करडी नजर राहणार आहे.