लोकमत न्यूज नेटवर्क
कोल्हापूर : स्थानिक भाजीपाल्याची मोठ्या प्रमाणात आवक सुरू असल्याने दरात मोठी घसरण होत आहे. घाऊक बाजारात कोबी मातीमोल दराने विकावे लागत असून दोन रुपये किलो दर झाला आहे. वांग्याच्या दरातही घसरण झाली आहे, किरकोळ बाजारात दहा रुपये किलो दर आहे. सरकी तेलाच्या दरात मात्र तेजी असून किरकोळ बाजारात १४० रुपये दर झाला आहे.
साधारणत: जानेवारीपासून स्थानिक भाजीपाल्याची आवक सुरू होते. त्यामुळे भाजीपाल्याचा दरात घसरण होते, हे जरी खरे असले तरी यंदा जरा जास्तच दर घसरले आहेत. कोबीचा हिरवागार गड्डा मातीमोल दराने विकावा लागत आहे. घाऊक बाजारात दोन तुपये किलोने कोबीचा दर झाला आहे. वांग्याची आवकही वाढली आहे, बाजार समितीत ६०० करंडीची आवक रोज होते. त्याचबरोबर स्थानिक वांग्याची आवकही वाढली आहे. त्यामुळे किरकोळ बाजारात दहा रुपये किलोपर्यंत दर आला आहे. टोमॅटोच्या दरातही घसरण झाली असून पंधरा रुपयाला दीड किलो दर आहे. ढब्बू, कारली, भेंडी, वरणा, दोडक्याचे दर वीस रुपये किलोच्या आत आहे. ओल्या वाटाण्याच्या दरातही काहीसी घसरण झाली असून ४० रुपये किलो आहे. घेवडा, गवारी तेजीत आहे. कोथंबिरची आवकही जास्त असल्याने किरकोळ बाजारात २५० रुपये शेकड्याचा दर आहे. मेथी, पालक व पोकळ्याचा दर शेकडा ३०० रुपये दर राहिला आहे.
कडधान्य मार्केटमध्ये दरात फारशी चढउतार पाहावयास मिळत नाही. तूरडाळ ११०, हरभरा डाळ ६५, मूगडाळ ११० रुपये किलो आहे. सरकी तेल १४० रुपये किलोवर असून ‘ब्याडगी’ मिरची ३०० ते ३५० रुपये किलो तर ‘सिजेंटा’ मिरची २५० ते ३०० रुपये किलो आहे. खोबऱ्याच्या दरात किलो मागे वीस रुपयांची वाढ झाली आहे.
आल्ले ३० रुपये किलो
चटणीचा हंगाम सुरू झाल्याने या कालावधीत आल्लेचे दर काहीसे चढे राहतात. मात्र, या आठवड्यात आल्याच्या दरात घसरण झाली असून किरकोळ बाजारात ३० किलो आहे.
कलिंगडांचे ढीग
उन्हाचा तडाखा वाढू लागला आहे. त्यामुळे फळांची मागणी वाढली आहे. कलिंगडेो ढीग बाजारात दिसत असून काळ्या पाठीचे कलिंगडे पाच रुपयांना मिळत आहे.