लोकमत न्यूज नेटवर्क
कोल्हापूर : साळोखेनगर येथील डॉ. डी. वाय. पाटील विद्यानिकेतनच्या घरफाळ्याबाबत आम्ही आरोप केल्यानंतरच या संस्थेने घरफाळा लागू करण्याबाबत हालचाली सुरू केल्याचा माजी महापौर सुनील कदम व माजी नगरसेवक सत्यजित कदम यांचा आरोप पूर्णपणे खोटा असल्याचे स्थायी समिती माजी सभापती शारंगधर देशमुख, भूपाल शेटे यांनी प्रसिध्दी पत्रकात म्हटले आहे. डी. वाय. पी. मॉलच्या घरफाळ्यासंदर्भात लवकरच सर्व कायदेशीर कागदपत्रे घेऊन याबाबतचे सत्य मांडणार असल्याचे त्यांनी म्हटले आहे.
पत्रकात म्हटले आहे की, कदम बंधूंनी (काळू-बाळू अशी संभावना) डी. वाय. पाटील समूहाच्या घरफाळ्याबाबत ७ मार्च २०२१ पासून तक्रारी सुरू केल्या आहेत. पण साळोखेनगर येथील संस्थेला घरफाळा आकारणी करण्यात यावी, अशी मागणी करणारा अर्ज संस्थेने १५ ऑक्टोबर २०२० रोजी महापालिकेला पाठविला आहे. याबाबत महापालिका स्तरावर कार्यवाही सुरू आहे. महापालिकेकडून घरफाळा लागू होण्यासंदर्भात पत्र मिळताच तातडीने हा घरफाळा संस्थेकडून भरण्यात येणार आहे. या शैक्षणिक कारणासाठी आरक्षित जागेमध्ये सुरू केलेल्या शैक्षणिक संस्थांसाठी बांधकाम परवानगी घेतली असून, सध्या या ठिकाणी १६३२ विद्यार्थी शिक्षण घेत असून १३५ स्टाफ आहे. याउलट माजी खासदार धनंजय महाडिक यांचे विकासवाडी येथील अभियांत्रिकी महाविद्यालय मात्र बंद पडले आहे. धनंजय महाडिक यांच्या तिन्ही मुलांच्या नावे असणाऱ्या मेसर्स पी. व्ही. के. एंटरप्राईजेस, कोल्हापूर या फर्मने विकासवाडी येथील इंजिनिअरिंग कॉलेजच्या मागे असलेल्या जमिनीमध्ये ७५२ ब्रास मुरूमाचे बेकायदेशीर उत्खनन केल्याबद्दल कागल तहसीलदारांनी त्यांना नोटीस बजावली आहे. त्यानुसार ३३ लाख ८ हजार रुपयांच्या दंडाची रक्कम बजावली आहे. या शैक्षणिक संकुलात बेकायदेशीर वाढीव बांधकाम केल्याबद्दल व त्याचा अनधिकृतपणे वापर सुरू असल्याबद्दल कागल नगरपरिषदेच्या मुख्याधिकाऱ्यांनी नोटीस बजावली आहे.