शिरोळ : नांदणी ते भैरववाडी रस्त्याची मोठी दुरवस्था झाली होती. महापुरामुळे रस्त्यावर पाणी आल्याने रस्त्यात ठिकठिकाणी खड्डे पडले होते. दरम्यान, या रस्त्यातील खड्डे बुजविण्याचे काम सुरू झाले आहे. त्यामुळे वाहनधारकांतून समाधान व्यक्त होत आहे. जयसिंगपूर-नांदणीहून कुरुंदवाडकडे जाण्यासाठी या मार्गाचा मोठ्या प्रमाणात वापर होत असतो.
---------------
स्वच्छतागृहाची पालिकेकडून स्वच्छता
जयसिंगपूर : येथील अकराव्या गल्लीतील डेबॉन्स कॉर्नर परिसरात असणाऱ्या स्वच्छतागृहाची स्वच्छता करण्यात आली आहे. गेल्या काही दिवसांपासून या ठिकाणी मोठ्या प्रमाणात दुर्गंधी तसेच घाणीचे साम्राज्य पसरले होते. तसेच या ठिकाणी मद्यप्यांचा वावर असल्याने स्वच्छतागृहात मद्याच्या बाटल्यांचा खच पडत असतो. दरम्यान, या स्वच्छतागृहाची स्वच्छता पालिकेकडून करण्यात आल्याने शहरवासीयांतून समाधान व्यक्त होत आहे.
----------------
गणेशोत्सवाची लगबग
जयसिंगपूर : गणेशोत्सवाचा सण दोन आठवड्यांवर येऊन ठेपला आहे. त्यामुळे बाजारपेठेत श्री गणेशाच्या आकर्षक मूर्ती पाहावयास मिळत आहे. तर सजावटीचे साहित्य, लाइटिंगसह इतर साहित्यखरेदीसाठी नागरिकांची गर्दी होत आहे. विविध आकर्षक गणपतींच्या मूर्तींकडे ग्राहक आकर्षिले जात आहेत.