सरवडे : बिद्री साखर कारखान्यातील मळीमिश्रित पाणी दूधगंगा नदीत मिसळल्याने नदीकाठावरील नागरिकांचे आरोग्य धोक्यात आले आहे. काठावरील शेकडो गावांतील हजारो नागरिक आजारी पडत असून मृत माशांचा खच व पाण्याला सुटलेल्या दुर्गंधीमुळे पिण्याच्या पाण्याचा प्रश्न निर्माण झाला आहे. कारखान्याने नदीत मिसळणारे दूषित पाणी रोखावे अन्यथा कारखान्यावर फौजदारी गुन्हा नोंद करण्याचा इशारा बिद्रीच्या नदीकाठावरील लोकप्रतिनिधींनी निवेदनाद्वारे दिला.
याबाबत माहिती अशी : गेल्या १५ दिवसांपासून दररोज रात्री दहाच्या दरम्यान दूधगंगा वेदगंगा सहकारी साखर कारखान्यातील मळीमिश्रित पाणी दूधगंगा नदीत सोडण्यात येते. मळी नदीत मिसळल्याने नदीकाठावरील जवळजवळ पन्नास ते साठ गावांतील नागरिकांचे आरोग्य धोक्यात आले आहे. काठावरील शेकडो गावांतील हजारो नागरिक गॕॅस्ट्रोने आजारी पडले आहेत. नदीत मृत माशांचा खच व पाण्याला सुटलेल्या दुर्गंधीमुळे पिण्याच्या पाण्याचा प्रश्न निर्माण झाला आहे. बिद्री,वाळवे खुर्द, कसबा वाळवा, कासारवाडा, चंद्रे, चांदेकरवाडी, पालकरवाडी, सोनाळी, चांदेकरवाडी, बेळवळे खुर्द, बेलवळे बु. केबळी, बाचणी, पालकरवाडी, आदी प्रमुख गावांतील शेकडो नागरिक यामुळे आजारी पडले आहेत.
कारखान्याचे कार्यकारी संचालक यांच्या टेबलावर बादलीत दूषित पाणी ओतून कारखाना प्रशासनाचा प्रतीकात्मक निषेध केला. कारखान्याने याबाबत त्वरित उपाययोजना केली नाही तर कारखान्याच्या संचालकांना दूषित पाणी पाजू व कारखान्यावर फौजदारी करू. यावेळी कार्यकारी संचालक आर. डी. देसाई म्हणाले, नदीत मिसळणाऱ्या दूषित पाण्याबाबत माहिती घेऊन योग्य उपाययोजना केली जाईल.
शिष्टमंडळात बाळासाहेब पाटील, अशोक पाटील, भास्कर खोत, प्रवीण खोत, उपसरपंच, पंचायत समितीचे सदस्य जयदीप पोवार, स्वाभिमानी संघटनेचे तालुकाध्यक्ष बाळासाहेब पाटील, उत्तम पाटील, उपसरपंच बाचणी, गोरख पाटील, सुदर्शन पाटील, शंकर पाटील- बेलवळे बु., बंडोपंत पाटील, सदाशिव मांडवकर, राजाराम सिरसट, नामदेव फराकटे, सचिन आबदार, सरपंच भाऊ पालकर उपस्थित होते.
...... फोटो : बिद्री साखर कारखान्याच्या प्रशासनाला निवेदन देताना नामदेव चौगले, अशोक फराकटे, बाळासाहेब पाटील व इतर उपस्थित होते.