कोल्हापूर : पूरग्रस्त भागात रोगराई पसरू नये यासाठी स्वच्छतेच्या आणि आरोग्याच्या सुविधा पुरविण्यासाठी युद्धपातळीवर कार्यवाही करा, पुराच्या पाण्याने अनेक ठिकाणी रस्ते खराब झाले आहेत, तेथील दुरुस्ती तातडीने हाती घ्या, पाणीपुरवठा लवकर सुरू करा, अशा सूचना आमदार चंद्रकांत जाधव यांनी महापालिका प्रशासनास दिल्या.
महापुरामुळे निर्माण झालेली परिस्थिती आणि नुकसानीबाबत आमदार जाधव यांनी महानगरपालिकेची आढावा बैठक घेतली. यावेळी ते बोलत होते. बैठकीस आयुक्त तथा प्रशासक डॉ. कादंबरी बलकवडे उपस्थित होत्या.
शहरातील ज्या भागात पुराचे पाणी होते, त्या भागात साथरोग पसरू नये म्हणून काळजी घेण्यासाठी त्वरित स्वच्छता करून घ्या. कीटकनाशक औषधांची व धुराची फवारणी करून घ्या, अशा सूचना आमदार जाधव यांनी दिल्या.
पुराचे पाणी ओसरेल तशी स्वच्छता सुरू असून, अनेक भागांतील स्वच्छता व औषध फवारणी झाल्याची माहिती मुख्य आरोग्य निरीक्षक जयवंत पवार यांनी दिली.
पुराचा फटका बसलेले सर्वच नागरिक, व्यापारी, व्यावसायिकांची माहिती एकत्र करा. नुकसानीचे पंचनामे वेळेत पूर्ण करावेत आणि भरपाई व मदतीचे प्रस्ताव तयार करून त्यांना राज्य आणि केंद्राच्या कोणकोणत्या योजनांमधून सवलत देता येईल, मदत करता येईल त्याबाबतचे प्रस्ताव तयार करण्याची सूचना आमदार जाधव यांनी दिली.
अतिरिक्त आयुक्त नितीन देसाई, उपायुक्त निखिल मोरे, उपायुक्त रविकांत आडसुळे, शिल्पा दरेकर, सहायक आयुक्त विनायक औंधकर, शहर अभियंता नेत्रदीप सरनोबत, नारायण भोसले, उपशहर अभियंता एन. एस. पाटील, हर्षजित घाटगे, बाबूराव दबडे, अरुण गवळी, आदी उपस्थित होते.
नागदेववाडी उपसा केंद्र आज सुरू होणार
नागदेववाडी जल उपसा केंद्र आजपर्यंत तर सोमवारपर्यंत शिंगणापूर जल उपसा केंद्र सुरू होईल. त्यानंतर शहराचा पाणीपुरवठा सुरळीत होईल, अशी माहिती प्रशासक डॉ. बलकवडे यांनी दिली.
फोटो क्रमांक - ३००७२०२१-कोल-केएमसी मीटिंग
ओळ - कोल्हापूर महानगरपालिका अधिकाऱ्यांच्या बैठकीत शुक्रवारी आमदार चंद्रकांत जाधव यांनी शहरातील स्वच्छता मोहीम, पाणीपुरवठा यांचा आढावा घेतला. यावेळी प्रशासक कादंबरी बलकवडे यांच्यासह सर्व अधिकारी उपस्थित होते.