चंदगड : ढोलगरवाडी (ता. चंदगड) येथील एका विवाहित तरुणीकडून सहा लाख रुपये घेऊन नोकरीचे व लग्नाचे आमिष दाखवून पीडित तरुणीवर अत्याचार केल्याप्रकरणी अनिल जोतिबा तळगूळकर (वय ३२, रा. मांडेदुर्ग) याच्यासह भरत सुबराव गावडे (४२, रा. आसगाव), महेश शहापूरकर (३५, रा. मांडेदुर्ग), उदय संतू पाटील (२८, रा. बसर्गे), बाबू शहापूरकर (३०, रा. मांडेदुर्ग), विश्वनाथ ओऊळकर (३२, रा. गौळवाडी, सर्व ता. चंदगड) या सहाजणांविरुद्ध गडहिंग्लज पोलिसांत गुन्हा नोंद झाला आहे.
या प्रकरणातील अनिल जोतिबा तळगूळकर याच्यावर खंडणी व महिलेवर अत्याचार असे दोन गुन्हे दाखल असून त्याला पोलिसांनी ताब्यात घेतले असून उर्वरित पाच संशयित आरोपी फरार आहेत.
पोलिसांतून मिळालेली माहिती अशी की, पीडित तरुणी ही पोलीस भरतीच्या इच्छेने फाट्यावरील एका अकॅडमीत शिकत होती. त्यावेळी तुला नोकरी लावतो म्हणून पीडित तरुणीकडून अनिल तळगूळकर व महेश शहापूरकर यांनी सहा लाख रुपये घेतले. अनिलने लग्नाचे आमिष दाखवून पीडितेवर अनेकदा अत्याचार केले.
दरम्यान, नोकरीसाठी दिलेले पैसे पीडित तरुणीने परत मागितल्यानंतर अनिलने ते पैसे परत न देता पीडित तरुणीला मारहाण करून तिच्या आई-वडिलांना जिवे मारण्याची धमकीही दिली. याबाबत पोलिसांत तक्रार करण्यास गेले असता भरत गावडे (रा. आसगाव), बाबू शहापूरकर व महेश शहापूरकर (रा. मांडेदुर्ग), विश्वनाथ ओऊळकर व उदय पाटील यांनीही तक्रार मागे घेण्यासाठी धमकावल्याचे पीडितेने म्हटले आहे. त्यानंतर या तरुणीने या सहाजणांविरुद्ध गडहिंग्लज पोलिसांत फिर्याद दिली. संबंधित संशयित आरोपींविरुद्ध विविध कलमांखाली गुन्हा नोंद झाला असून, चंदगड पोलीस अधिक तपास करीत आहेत.