कोल्हापूर : कोरोना संसर्गाचा धोका अद्याप टळला नसल्याने गणेशोत्सवात मिरवणुका काढण्यावर बंदी घातली आहे. त्यामुळे गणेश आगमनादिवशी आज, शुक्रवारी राजारामपुरीवर पोलिसांची विशेष करडी नजर राहणार आहे. शहरासह जिल्ह्यात सुमारे अडीच हजार पोलीस बंदोबस्त तैनात येणार आहे. रेल्वेस्थानक, बस स्टँन्डसह मंदिरांची बॉम्ब शोधक व नाशक पथकाकडून तपासणी करण्यात येणार आहे, अशी माहिती पोलीस अधीक्षक शैलेश बलकवडे यांनी दिली.
कोरोना कमी झाला असला तरीही त्याचा धोका टळलेला नाही, त्यामुळे गणेशोत्सवात जिल्हा प्रशासनाने घालून दिलेले निर्बंध नागरिकांनी पाळावेत, गर्दी टाळण्यासाठी प्रयत्न करावेत, असे आवाहन पोलीस प्रशासनाने केले आहे. भाविकांसाठी थेट गणेश दर्शनाची सोय करण्याऐवजी ऑनलाइन दर्शनाची सोय करण्याचे आवाहन केले आहे. गणेशोत्सवाला आज, शुक्रवारपासून प्रारंभ होत आहे. गणेश आगमन आणि विसर्जन मिरवणुकीवर प्रशासनाने बंदी घातली. त्यामुळे आगमनदिवशी दरवर्षी राजारामपुरीत गणेश मिरवणुकीचे मुख्य आकर्षण असते. पण या मिरवणुकीवर बंदी घातल्याने राजारामपुरी परिसरात मिरवणुका निघणार नाहीत यासाठी पोलीस खात्याने दक्षता घेत मोठा पोलीस बंदोबस्त तैनात केला आहे. मिरवणुका काढल्यास कार्यकर्त्यावर गुन्हे दाखल करण्यात येणार आहेत.
आज, शुक्रवारचा पोलीस बंदोबस्त
पोलीस कर्मचारी - २३३०
अधिकारी - १५१
होमगार्ड - १५१०
राज्य राखीव दल तुकड्या -०२