चोरीचे दागिने विकत घेणाऱ्या सराफाला अटक

१५ किलो चांदी हस्तगत : तीन दिवसांची पोलीस कोठडी

कोल्हापूर : दाम्पत्याकडून चोरीचे दागिने विकत घेणाऱ्या गुजरीतील ओसवाल अलंकार ज्वेलर्सच्या मालकास बुधवारी शाहूपुूरी पोलिसांनी अटक केली. संशयित भरत रूपचंद ओसवाल (वय ३६, रा. राजाराम रोड, बिंदू चौक) असे त्याचे नाव आहे. त्याच्याकडून सुमारे १५ किलो चांदी पोलिसांनी हस्तगत केली. त्याच्यासह संशयित मोलकरीण हेमलता राहुल कुलकर्णी (वय ३७) यांना न्यायालयात हजर केले असता तीन दिवसांच्या पोलीस कोठडीत रवानगी करण्यात आली. पोलिसांनी रात्री उशिरापर्यंत त्यांच्याकडे चौकशी करून त्यांची करवीर पोलीस ठाण्याच्या कोठडीत रवानगी केली. मोलकरीण हेमलता कुलकर्णी हिने पती राहुल धोंडोपंत कुलकर्णी याच्या संगनमताने साइक्स एक्स्टेन्शन येथील घरमालक उप्पल शहा यांच्या घरातील सोन्या-चांदीच्या दागिन्यांसह किमती मोबाईल असा सुमारे ३१ लाख २५ हजार किमतीच्या मुद्देमालाची चोरी केली होती. याप्रकरणी शाहूपुरी पोलिसांनी या दाम्पत्यास अटक केली. त्यांच्याकडे चौकशी केली असता त्यांनी गुजरीतील ओसवाल नावाच्या सराफाला चोरीचे सोन्या-चांदीचे दागिने विकले. त्यातून मिळालेल्या पैशांमध्ये दोन आलिशान गाड्या खरेदी केल्याची कबुली दिली. त्यानुसार पोलीस हवालदार रवी पाटील यांनी ओसवाल अलंकार ज्वेलर्सचा मालक भरत ओसवाल याला अटक केली. या घटनेनंतर सराफ बाजारपेठेत एकच खळबळ उडाली. त्याच्याकडे चौकशी केली असता त्याने १५ किलो चांदी पोलिसांना परत केली. उर्वरित चांदीही मिळविण्याचा पोलीस प्रयत्न करीत आहेत. ओसवाल याला अटक झाल्याने सराफ व्यावसायिकांत खळबळ उडाली आहे. याप्रकरणी अधिक तपास पोलीस निरीक्षक अरविंद चौधरी करीत आहेत. (प्रतिनिधी)