वेंगुर्ले : आंतरराष्ट्रीय पॉवरलिफ्टिंग स्पर्धेत तीन सुवर्णपदके मिळविणाऱ्या अनुजा तेंडोलकर यांची विजयी रॅली काढण्यात आली. जमशेदपूर येथे पार पडलेल्या आंतरराष्ट्रीय पॉवरलिफ्टिंग स्पर्धेत वेंगुर्लेतील सातेरी व्यायामशाळेची खेळाडू अनुजा तेंडोलकर हिने तीन सुवर्णपदकांची प्राप्ती करत वेंगुर्लेचा नावलौकिक केला. त्यांच्या या कामगिरीची दखल घेऊन वेंगुर्लेवासीयांतर्फे तेंडोलकर यांची विजयी रॅली काढली. तत्पूर्वी तालुका व्यापारी संघातर्फे त्यांचे पुष्पगुच्छ देऊन स्वागत केले. मारुती स्टॉप, बाजारपेठ, दाभोली नाका, बॅ. नाथ पै मार्गे सातेरी व्यायामशाळा अशी रॅली काढली. रॅलीत राष्ट्रीय योग खेळाडू मीरा सावंत, राष्ट्रीय पॉवरलिफ्टिर सोनाली मुंडले, राज्य खेळाडू हर्षदा तोरसकर, क्रीडा प्रशिक्षक अमोल तांडेल, संदेश रेडकर, पॉवरलिफ्टिंग संघटनेचे सदस्य हेमंत नाईक, शैलेश खानोलकर, हेमा गावकर, व्यायाम शाळेचे शिक्षक किशोर सोन्सुरकर, शरीर सौष्ठवपटू हेमंत चव्हाण, संतोष कीर, जयेश परब आदी उपस्थित होते. (प्रतिनिधी)
वेंगुर्ले येथे अनुजा तेंडोलकर यांचा सत्कार
By admin | Updated: January 2, 2015 21:47 IST