राजू शेट्टींच्या विजयानंतर वाळवा तालुक्यात जल्लोष

इस्लामपूर : हातकणंगले लोकसभा मतदार संघातून विद्यमान खासदार व महायुतीचे उमेदवार राजू शेट्टी यांनी दणदणीत विजय मिळवल्यानंतर वाळवा तालुक्यातील त्यांच्या समर्थकांसह महायुतीच्या कार्यकर्त्यांनी सकाळपासूनच जल्लोषाला सुरुवात केली. गुलालाची उधळण, फटाक्यांची आतषबाजी करीत मोटारसायकल रॅली काढून विजयोत्सव साजरा करण्यास सुरुवात केली होती. शहरातील सर्वच भागांमध्ये फटाक्यांची आतषबाजी सुरु होती. सकाळपासून मतमोजणीचा कल आणि खासदार राजू शेट्टी यांची आघाडी समजताच शिवसेनेचे जिल्हाप्रमुख आनंदराव पवार व त्यांच्या समर्थकांनी विजयोत्सवाला सुरुवात केली. भगवे ध्वज, शिट्ट्यांचा दणदणाट करीत मोटारसायकलवरुन रॅली काढून जल्लोष केला. तहसील कचेरी परिसरातील छत्रपती शिवाजी महाराज यांच्या पुतळ्याला वंदन करुन शिवसैनिकांनी जल्लोष केला. यल्लम्मा चौक येथे २५ औटांची विजयी सलामी देताना शिवसैनिकांनी परिसर दणाणून सोडला होता. उरुण परिसरातील दादा पाटील यांनी सकाळी ८ वाजल्यापासूनच औटांची आतषबाजी करायला सुरुवात केली होती. भारतीय जनता पक्षाचे युवा मोर्चाचे प्रदेश उपाध्यक्ष विक्रमभाऊ पाटील यांच्या समर्थकांनी शहरातील प्रमुख मार्गावरुन रॅली काढून भावी पंतप्रधान नरेंद्र मोदी, गोपीनाथ मुंडे, पूनम महाजन, राजू शेट्टी, संजय पाटील यांच्या विजयाच्या घोषणा देत पालिका प्रवेशद्वारासमोरही जल्लोष केला. ग्रामविकासमंत्री जयंत पाटील यांच्या कासेगावमध्ये शेट्टी समर्थकांनी फटाक्यांची आतषबाजी व गुलालाची उधळण करीत विजयोत्सव साजरा केला. दुपारी सर्व कार्यकर्ते एकत्रित जमा झाले. यावेळी राजू शेट्टी यांच्या विजयाच्या घोषणा देण्यात आल्या. लोकसभा निवडणुकीतील दणदणीत विजयाचे संकेत स्पष्ट होताच कृष्णाकाठच्या परिसरातील खासदार शेट्टी यांच्या बिनीच्या शिलेदारांनी येडेमच्छिंद्र येथे जाऊन क्रांतिसिंह नाना पाटील यांच्या पुतळ्याला पुष्पहार अर्पण करुन अभिवादन केले. येडेमच्छिंद्र, शिरटे, नरसिंहपूर, बहे, हुबालवाडी, खरातवाडी, साखराळे, बोरगाव या कृष्णाकाठच्या गावांमधून मोटारसायकल रॅली काढून कार्यकर्त्यांनी जल्लोष केला. कामेरी (ता. वाळवा) येथे राजू शेट्टी यांच्या समर्थकांनी गुलालाची उधळण व फटाक्यांची आतषबाजी करीत विजयोत्सव साजरा केला. त्यानंतर गावातील प्रमुख मार्गावरुन मोटारसायकल रॅली काढली. रात्री उशिरापर्यंत कामेरीत फटाक्यांची आतषबाजी सुरु होती. त्याचबरोबर विठ्ठलवाडी येथेही राजू शेट्टी यांचा विजयोत्सव साजरा झाला. (वार्ताहर)