कोल्हापूर : जिल्ह्यात ब्रेक द चेन आदेश लागू असून, याअंतर्गत सुरू असलेल्या संचारबंदीची प्रभावीपणे अंमलबजावणी करावी, नियमांचे उल्लंघन करणाऱ्यांवर दंडात्मक कडक कारवाई करण्याचे आदेश जिल्हाधिकारी दौलत देसाई यांनी शुक्रवारी दिले. वारंवार नियमांचे उल्लंघन झाल्यास दुकाने बंद करण्याचा इशाराही त्यांनी दिला.
जिल्हाधिकारी कार्यालयात त्यांनी दूरदृश्यप्रणालीद्वारे अतिरिक्त पोलीस अधीक्षक, उपविभागीय अधिकारी, उपविभागीय पोलीस अधिकारी, तहसीलदार, पोलीस निरीक्षक, गटविकास अधिकारी, मुख्याधिकारी यांची बैठक घेतली. यावेळी पोलीस अधीक्षक शैलेश बलकवडे, प्रभारी मुख्य कार्यकारी अधिकारी अजयकुमार माने, अपर जिल्हाधिकारी किशोर पवार, निवासी उपजिल्हाधिकारी भाऊसाहेब गलांडे, जिल्हा शल्यचिकित्सक डॉ. अनिल माळी, एमआयडीसीचे प्रादेशिक अधिकारी धनंजय इंगळे उपस्थित होते.
जिल्हाधिकारी देसाई म्हणाले, संचारबंदीची प्रभावी अंमलबजावणी करून विनाकारण होणारी हालचाल थांबवली पाहिजे. नियम न पाळणाऱ्या दुकानांवर तसेच व्यक्तींवर दंडात्मक कारवाई करावी. वारंवार नियमांचे उल्लंघन झाल्यास दुकान बंद करा.
अत्यावश्यक सेवेशी निगडित उद्योग, निर्यातक्षम उद्योग, सातत्याने प्रक्रिया असणारा उद्योग आणि कामगार राहत असलेल्या उद्योगाच्या ठिकाणी अधिकाऱ्यांची नियुक्ती करण्यात येणार आहे. तेथे कर्मचारी पॉझिटिव्ह सापडला तर उद्योग बंद करून ते निर्जंतुकीकरण करून इतर कर्मचाऱ्यांची चाचणी करावी.
प्रभारी मुख्य कार्यकारी अधिकारी माने म्हणाले, गावात येणाऱ्या व बाहेर जाणाऱ्या व्यक्तींवर नियंत्रण हवे. पॉझिटिव्ह रुग्णांची यादी सरपंच, ग्रामसेवक यांना द्यावी. त्यामुळे रुग्ण घराबाहेर फिरणार नाहीत याची दक्षता घेता येईल.
पोलीस अधीक्षक बलकवडे म्हणाले, इचलकरंजीमध्ये विनाकारण फिरणाऱ्यांवर चांगली कारवाई झाली आहे. अशीच कारवाई अन्य ठिकाणीही होणे अपेक्षित आहे. सध्या यात्रांचे दिवस सुरू होत असून, त्या ठिकाणी गर्दी होणार नाही, सर्वसामान्य गरिबांना कारवाईचा त्रास होणार नाही, याचीही दक्षता घ्यावी.
आयुक्त डॉ. कादंबरी बलकवडे यांनीही सर्वांनी आदेशाची कडक अंमलबजावणी करावी. कचरा उचलणे, साफसफाई, निर्जंतुकीकरण यावरही भर हवा व नियमांचे उल्लंघन करणाऱ्यांवर दंडात्मक कारवाई करण्याच्या सूचना केल्या.
--
फोटो नं १६०४२०२१-कोल-कोरोना आढावा बैठक
ओळ : कोल्हापुरातील जिल्हाधिकारी कार्यालयात शुक्रवारी झालेल्या कोरोना आढावा बैठकीत जिल्हाधिकारी दौलत देसाई यांनी अधिकाऱ्यांना सूचना केल्या. यावेळी पोलीस अधीक्षक शैलेश बलकवडे, अपर जिल्हाधिकारी किशोर पवार यांच्यासह अधिकारी उपस्थित होते.