कोल्हापूर : येथील मटण मार्केट परिसरात रस्त्याकडेला कुलूपबंद करून उभी केलेली दुचाकी अज्ञाताने चोरून नेली. याबाबत दुचाकीमालक रवींद्र यशवंत कदम (वय ४४, रा. प्लॉट नं. ७, गुरुप्रसादनगर, आयटीआयच्या पिछाडीस) यांनी दुचाकी चोरीची तक्रार लक्ष्मीपुरी पोलीस ठाण्यात दिली.
दुचाकीस्वार महिला जखमी
कोल्हापूर : मोटारकारने ठोकरल्याने मोपेडस्वार महिला गंभीर जखमी झाल्या. संध्या दिलीप इनामदार (वय ६१, रा. इंगळेनगर, रिंग रोड) असे जखमीचे नाव आहे. संभाजीनगर पेट्रोल पंप ते आयसोलेशन हॉस्पिटल मार्गावर ही घटना घडली, मैत्रिणीच्या घराकडून आपल्या घराकडे जात असताना अज्ञात मोटारकारने ठोकरल्याने त्या जमिनीवर पडून जखमी झाल्या. याची नोंद जुना राजवाडा पोलीस ठाण्यात झाली आहे.
मोबाईल चोरी
कोल्हापूर : वाशी (ता. करवीर) येथील अभिजित ज्ञानदेव पाटील (रा. वाशी) हे आपल्या शेळेवाडी रोड नावाच्या शेतातील जनावरांच्या गोठ्यात गेले होते. त्यावेळी त्यांनी शेतातील बांधावर उभ्या केलेल्या दुचाकीवर आपला मोबाईल ठेवला होता. तो मोबाईल अज्ञाताने चोरला. त्याबाबत करवीर पोलीस ठाण्यात चोरीचा गुन्हा नोंद झाला.
(तानाजी)