कोल्हापूर : फ्लॅटमध्ये बसून दारू पिताना झालेल्या वादातून मित्रानेच मित्राचा गळा दाबून आणि मारहाण करून खून केला. हा प्रकार राजारामपुरी येथील सातव्या गल्लीतील कोटणीस हाइट्स येथे रविवारी (दि. १२) पहाटेच्या सुमारास घडला. दिनेश अशोक सोलाकुरकर (वय 34 रा. रेखानगर, गारगोटी, ता. भुदरगड) असे मृताचे नाव आहे. संशयित आरोपी सन्मेश अशोक तेंडुलकर (वय ५४, रा. कोटणीस हाइट्स, राजारामपुरी) याला घटनास्थळावरून पोलिसांनी ताब्यात घेतले. याबाबत सुजाता अशोक सोलांकुरकर (वय 55, रा. रेखा नगर गारगोटी) यांनी राजारामपुरी पोलीस ठाण्यात फिर्याद दिली.
याबाबत अधिक माहिती अशी की, संशयित आरोपी सन्मेष आणि दिनेश हे दोघे मित्र होते. दिनेश हा तीन दिवसांपासून सनमेश याच्या राजारामपुरी येथील फ्लॅटमध्ये राहत होता. शनिवारी रात्री उशिरा दोघे हॉलमध्ये बसून मद्यप्राशन करीत होते. दोघांमध्ये झालेल्या वादानंतर संमेश याने शिवीगाळ करून दिनेश याला मारहाण केली. तसेच दोन्ही काखेतून हात घालून मान दाबल्याने दिनेश याचा मृत्यू झाला. घटनेची माहिती मिळताच राजारामपुरी पोलीस घटनास्थळी पोहोचले. त्यांनी घटनास्थळावरूनच संशयित आरोपी संमेष तेंडुलकर याला ताब्यात घेतले.