डोंबिवली - महावितरणकडे मोबाईल क्रमांकांची नोंदणी करणाऱ्या वीज ग्राहकांना मीटर रिडींग, वीजबिलाचा तपशील, वीज बंद असण्याचा कालावधी यासह विविध माहिती 'एसएमएस'द्वारे पाठविण्यात येते. कल्याण परिमंडलातील २४ लाख ३६ हजार म्हणजेच ८७ टक्के ग्राहकांनी त्यांचे मोबाईल क्रमांक नोंदवले आहेत. उर्वरित ग्राहकांनीही आपल्या मोबाईल क्रमांकांची नोंदणी करून उपलब्ध सुविधांचा लाभ घ्यावा, असे आवाहन महावितरणने केले आहे.
कल्याण परिमंडलात कृषिपंप ग्राहक वगळता घरगुती, वाणिज्यिक, औद्योगिक व इतर असे एकूण २८ लाख १० हजार वीज ग्राहक आहेत. यातील जवळपास ८७ टक्के ग्राहक मोबाईल नोंदणीच्या माध्यमातून महावितरणशी जोडले आहेत. या ग्राहकांना मीटर रीडिंग घेतल्यानंतर काही तासांच्या आत रिडींग घेतल्याची तारीख, वेळ, सध्याचे एकूण युनिट व वापरलेले विजेचे युनिट याचा तपशील असणारा 'एसएमएस' महावितरणकडून पाठविण्यात येतो. यात विसंगती आढळल्यास तातडीने तक्रार करून बिलासंदर्भात निर्माण होणारे नंतरचे वाद टाळता येतात. तर वीजबिल तयार झाल्यानंतर बिलाची रक्कम व बिल भरण्याची अंतिम मुदत याची माहिती असणारा 'एसएमएस' ग्राहकांना पाठविला जातो. हा 'एसएमएस' बिल भरणा केंद्रावर दाखवून बिल भरता येते किंवा दिलेल्या लिंकच्या माध्यमातून ऑनलाईन बिल भरणा करता येतो.
याशिवाय नियोजित देखभाल व दुरुस्तीसाठी बंद ठेवण्यात येणारा वीजपुरवठा व पुरवठा खंडित राहण्याचा कालावधी याची पूर्वसूचना 'एसएमएस' मार्फत दिली जाते. तांत्रिक किंवा इतर कारणामुळे वीज पुरवठा बंद झाला असल्यास त्याची माहिती व वीजपुरवठा पूर्ववत होण्यासाठी लागणाऱ्या कालावधीची माहितीही या सुविधेतून मिळते. एखाद्या कारणास्तव मीटरचे रिडींग घेणे शक्य नसल्यास ग्राहकानेच मीटर रिडींग घेऊन ॲपद्वारे महावितरणला सादर करण्याबाबत तसेच थकबाकीपोटी वीजपुरवठा खंडित करण्याची पूर्वसूचना 'एसएमएस'द्वारे देण्यात येते.
असा नोंदवा मोबाईल क्रमांक
नोंदणी करावयाच्या मोबाईल क्रमांकावरून MREG नंतर स्पेस द्यावा व त्यानंतर आपला बारा अंकी ग्राहक क्रमांक टाईप करून ९९३०३९९३०३ या क्रमांकावर 'एसएमएस' पाठवावा. या एका 'एसएमएस'वरून ग्राहकाच्या मोबाईलची नोंदणी होते. याशिवाय महावितरणचे www.mahadiscom.in हे संकेतस्थळ किंवा मोबाईल ॲपवरूनही मोबाईलची नोंदणी करता येते.