लोकमत न्यूज नेटवर्क, डोंबिवली: कल्याण ग्रामीणमधील २७ बिल्डरांच्या विरोधात येथील मानपाडा पोलीस ठाण्यात फसवणूकीचा गुन्हा दाखल झाला असताना सोमवारी रात्री उशीरा डोंबिवलीतील ३८ बिल्डरांच्या विरोधात रामनगर पोलिसांनी गुन्हा दाखल केला आहे. केडीएमसीच्या नगररचना विभागाच्या तक्रारीनंतर हा गुन्हा दाखल झाला आहे. बनावट कागदपत्रांच्या आधारे बांधकाम परवानगी मिळविल्याचा आरोप संबंधित बिल्डरांवर आहे. आतापर्यंत ६५ बिल्डरांविरोधात गुन्हा दाखल झाल्याने एकच खळबळ उडाली आहे.
कल्याण डोंबिवलीतील बेकायदा बांधकामांचा मुद्दा नेहमीच चर्चेत असतो. केडीएमसी प्रशासनाकडून वारंवार कारवाईचे दावे केले जात असलेतरी मनपा हद्दीत सर्रास बेकायदा बांधकाम सुरू असल्याचे चित्र पहायला मिळते. बेकायदा बांधकामांवरून उच्च न्यायालयाने केडीएमसीला याआधीही फटकारले आहे. परंतू चित्र जैसे थे आहे. दरम्यान माहिती अधिकार कार्यकर्ते संदीप पाटील यांनीही बेकायदा बांधकामांबाबत मनपा प्रशासनाकडे तक्रार करताना उच्च न्यायालयात याचिका दाखल केली आहे. बनावट कागदपत्रे सादर करुन खोटया सही शिक्याच्या आधारे रेराचे प्रमाणपत्र मिळविल्याचा आरोप पाटील यांचा आहे. त्यांच्या आरोपानंतर केडीएमसीने या तक्रारीची चौकशी केली असता त्यांच्या आरोपात तथ्य आढळून आले.
अखेर मनपाच्या नगररचना विभागातील अधिका-यांच्या तक्रारीनंतर डोंबिवली मानपाडा पोलीस ठाण्यात २८ सप्टेंबरला २७ बिल्डरांच्या विरोधात गुन्हा दाखल झाला आहे. सोमवारी रात्री उशीरा अशाच प्रकारे बनावट कागदपत्रांच्या आधारे इमारत बांधकामाची परवागनी मिळविणा-या ३८ बिल्डरांच्या विरोधात रामनगर पोलीस ठाण्यात गुन्हा दाखल झाला आहे. महापालिकेच्या तक्रारीवरून गुन्हा दाखल करण्यात आला असून पुढील तपास सुरू असल्याची माहीती रामनगर पोलीस ठाण्याचे वरीष्ठ पोलीस निरिक्षक सचिन सांडभोर यांनी दिली.
हा आहे आरोप
संबंधित ३८ बिल्डरांनी २०१९ पासून ते आतार्पयत बांधकाम करण्यासाठी केडीएमसीचा विकास अधिभार शुल्क न भरता बांधकाम परवानगीची बनावट कागदपत्रे तयार करून ती बांधकाम करण्याच्या जागी डोंबिवली परिसरात ती खरी आहेत असे भासवून सादर केली आणि महापालिकेची फसवणूक केली असा आरोप दाखल झालेल्या तक्रारीत त्यांच्यावर केला गेला आहे.