तब्बल २६ कोटींचे हॉटेल केवळ ११८ रूपयांत कुणीही खरेदी करू शकते, हे ऐकल्यावर तुम्हीही विश्वास ठेवणार नाही. इंग्लंडच्या केटरिंग शहरात १४७ वर्ष जुने रॉयल हॉटेलचा लिलाव होणार आहे. प्रॉपर्टी डेवलपर नाइम पेमैन यांनी २०२० साली २६ कोटी रूपयात हे खरेदी केले होते. त्यांनी या हॉटेलवर ३८ कोटी रुपये खर्च केले आहेत.
नाइम यांनी हॉटेलच्या रेस्टोरंटवर १२ कोटी रुपये खर्च केलेत. इतका पैसा खर्च करूनही त्याचे काम पूर्ण झाले नाही. नाइम पेमैन यांच्याकडे आता पैसे शिल्लक नाहीत. त्यामुळे त्यांनी कुठल्याही रिजर्व दराशिवाय केवळ १ पाऊंड म्हणजे भारतीय चलनात ११८ रुपये लिलाव किंमत ठेवली आहे. परंतु हे हॉटेल खरेदी करणाऱ्यांसाठी एक अट आहे. त्यांना हॉटेलचं अर्धवट राहिलेले काम पूर्ण करण्यासाठी आणखी १२ कोटी खर्च करावे लागतील. या हॉटेलचा लिलाव ३१ जुलै रोजी होणार आहे.
काय होता पेमैनचा प्लॅन?
पेमैनला हे हॉटेल एक उत्तम ठिकाण बनवायचे होते. त्याला इथं लग्नाचे ठिकाण, रेस्टॉरंट, नाईट क्लब आणि कॅफे बनवायचे होते. पण आता त्याच्याकडील पैसे संपले आहेत. म्हणूनच तो त्याचे स्वप्न पूर्ण करू शकत नाही. त्यामुळे आता मालमत्ता शोधणाऱ्यांना ही व्हिक्टोरियन इमारत फक्त एक पौंडमध्ये खरेदी करण्याची संधी मिळत आहे.
ऐतिहासिक हॉटेल
या हॉटेलमध्ये ४३ खोल्या आहेत. त्याचा इतिहास १४७ वर्षे जुना आहे. राणी व्हिक्टोरिया आणि चार्ल्स डिकन्स सारख्या सेलिब्रिटींनीही येथे वास्तव्य केले आहे. जर तुम्ही ते खरेदी केले तर तुम्हाला हॉटेलची मुख्य इमारत मिळेल. त्यात एक मोठा बॉलरूम, बिलियर्ड रूम (ज्यामध्ये काचेचा घुमट आहे), एक जुना बार आणि अनेक कार्यक्रम ठिकाणे देखील मिळतील.
का विकायचं आहे?
मी गेल्या एका वर्षात खूप प्रयत्न केले, पण प्रकल्प पूर्ण करण्यासाठी आवश्यक पैसे जमवू शकलो नाही असं पेमैनने सांगितले. एक गुंतवणूकदार ४ मिलियन डॉलर देण्यासाठी तयार होता पण मी त्यास नकार दिला. मात्र त्यानंतर मला हे विकण्याचा खूप कठीण निर्णय घ्यावा लागला. कोणीतरी पुढे येईल जो रॉयल हॉटेलच्या भविष्यासाठी माझे स्वप्न पूर्ण करेल. कोणीतरी ते विकत घ्यावे आणि प्रकल्प पुढे न्यावा, त्याचे अपार्टमेंटमध्ये रूपांतर करू नये असं पेमैनला वाटते.