सतीश जोशी , परभणी
जगातील सात खंडातील सर्वात उंचीची असलेली शिखरे सर करण्याची परभणीच्या मधुरा गणेशराव दुधगावकर हिची महत्वाकांक्षा जिल्ह्यासाठी खरोखरंच अभिमान वाटणारी अशीच आहे. अनेक शिखरे सर केल्यानंतर एव्हरेस्टची तिची मोहीम नैसर्गिक आपत्तीमुळे अर्धवट राहिली तरी तिने पुढील प्रयत्नात हे शिखर गाठणारच, असा मनोदय लोकमतशी बोलताना व्यक्त केला. मधुरा ही परभणीचे खा.गणेशराव दुधगावकर आणि प्रा.संध्याताई दुधगावकर यांची कन्या. काहीतरी धाडसी कार्य करण्याचा तिचा स्वभाव. अमेरिकेत नोकरी करताना तिला ट्रॅकिंगची आवड निर्माण झाली. छोटे- मोठे शिखरे सर करताना जगातील मोठी शिखरे सर करण्याचा दृढ निश्चिय तिने केलाच नाही तर त्यासाठी परिश्रमही केले. २००५ पासून ती ट्रॅकिंग करीत असून १४ हजार फूट उंचीचे कॅलिफोर्निया येथील शास्ता हे शिखर सर केले. त्यानंतर जगातील सात खंडातील जी सर्वात उंच शिखरे आहेत, त्याकडे तिने लक्ष केंद्रित केले. २००७ मध्ये अर्जेनटिनातील २३ हजार फुट उंचीचे अ‍ॅक्वॉनगुवा हे शिखर सर करण्यासाठी मोहीम आखली. परंतु, १७ हजार फुट उंचीवर पोहोचल्यानंतर हीम वादळामुळे ही मोहीम अर्धवट सोडून परतावे लागले. २००८ मध्ये अ‍ॅस्ट्रोलियातील कौसियास्को हे ९ हजार फुट उंचीचे शिखर सर केले. २०१० मध्ये उत्तर अमेरिकेतील २० हजार २०० फुट उंचीचे मॅक्निले हे शिखर मधुराने सर केले. यानंतर २०११ मध्ये अफ्रिकेतील १९ हजार फुट उंचीचे केलिमांज्रो सर केले. एका पाठोपाठ एक अशी उंचीचे शिखरे सर करताना तिने आपली मोहीम आशिया खंडातील एव्हरेस्टकडे वळविली. २९ हजार २९ फूट उंचीचे हे शिखर खरोखरच कठीण गोष्ट होती. १८ एप्रिल १४ रोजी ती पहिल्या टप्प्यात १७ हजार फुटावरील उंचीपर्यंत पोहचली देखील. परंतु, हीम वर्षावामुळे जवळपास १६ शेर्पा यांचा अपघाती मृत्यू झाल्याने ट्रेकींग बंद केले. मधुरा आणि तिच्या साथीदारांनाही मोहीम थांबवावी लागली असली तरी महत्वकांक्षा अधिक पटीने वाढली आहे. एव्हरेस्ट सर करण्याचे मधुरा दुधगावकराचे स्वप्न आहे.