ऑनलाइन लोकमत
बरेली, दि. 3 - एका 12 वर्षाच्या शूर मुलीने आपल्या आईला सामूहिक बलात्कारापासून वाचवलं असल्याची घटना समोर आली आहे. रविवारी रात्री ही घटना घडली. आपल्या आईवर बलात्काराचा प्रयत्न होताना पाहून ही मुलगी एकटी चौघा हल्लेखोरांसोबत भिडली आणि लढा दिला. ग्रामस्थांनी घटनास्थळी धाव घेताच सर्व हल्लेखोरांनी पळ कढाला. मुलीच्या आईला चाकू लागल्याने काही जखमा झाल्या आहेत.
ही महिला आपल्या दोन मुलांसहित शेतात असताना चार जणांनी तिच्यावर हल्ला केला. 'मला जबरदस्ती जवळच्या झोपडीत घेऊन गेले आणि माझ्यावर बलात्कार करण्याचा प्रयत्न केला. माझी मुलगी एकटी त्यांना भिडली. त्यांनी तिला धमकावलं, मारलं पण तरीही ती मागे हटली नाही. काही वेळानंतर आमचा आवाज ऐकून गावकरी मदतीसाठी धावत आले. मात्र तोपर्यंत हल्लेखोरांनी पळ काढला होता,' अशी माहिती महिलेने दिली आहे.
चौघे आरोपी एकाच गावात राहणारे असून त्यांची ओळख पटली आहे. सत्यपाल गंगवार, दिजेंद्र गंगवार, सुभाष गंगवार और जयंत गिरी अशी त्यांची नावे आहेत. कोणालाही अद्याप अटक झालेली नाही. महिलेच्या नातेवाईकांनी पोलिसांत तक्रार केल्यानंतर एफआयआर दाखल करण्यात आला होता. मात्र पोलिसांनी महिलेचा दावा फेटाळला असून जमिनीचा वाद असल्याचं सांगितलं आहे. 'याआधीही यांच्यात जमिनीवरुन वाद झाले असून जाणुनबुजून बलात्काराचा आरोप केला जात असल्याचं,' पोलिसांचं म्हणणं आहे.