ऑनलाईन लोकमत
जळगाव, दि. 18 - रावेर तालुक्यातील ऐनपूर येथील मद्य विक्री दुकाने कायमस्वरुपी बंद करण्याचे आदेश जिल्हाधिकारी किशोर राजे निंबाळकर यांनी शुक्रवारी दिले. ऐनपूर येथे दारुबंदी करण्यासंदर्भात मातोश्री रमाबाई बहुउद्देशीय संस्था, ऐनपूर आणि महिलांनी 29 एप्रिल रोजी ऐनपूर येथील दारुबंदीसाठी निवेदन दिले होते. याबाबत भुसावळ येथील राज्य उत्पादन शुल्क निरीक्षकांनी सह्याची पडताळणी करून याबाबतचा अहवाल रावेर तहसीलदार यांना सादर केला होता. त्यानंतर रावेर येथील तहसीलदारांनी दारुबंदी संदर्भात मतदान प्रक्रिया राबवून एकूण 2615 महिला मतदारांपैकी 1555 महिला मतदारांनी मद्य विक्री बंद करण्यासाठी मतदान केले होते. एकूण 59 टक्के महिला मतदारांनी दारुबंदीच्या बाजूने मतदान केले होते. हे मतदान 50 टक्के पेक्षा जास्त असल्याने गृहविभागाच्या दारुबंदी कायद्याच्या तरतुदीनुसार ही कार्यवाही करण्यात आली आहे.रद्द करण्यात आलेल्या परवाना धारकांना ते जिल्ह्यात इतरत्र स्थालांतरीत करण्याची मुभा राहील, असेही या आदेशात नमूद करण्यात आले आहे.