फोटो
लोकमत न्यूज नेटवर्क
जळगाव : ऑक्सिजन पुरवठा खंडित झाल्याने प्रतिभा कैलाससिंग परदेशी (४८, रा.सावदा, ता.रावेर) या महिलेचा मृत्यू झाल्याची घटना मंगळवारी दुपारी चार वाजता मेहरुण मधील सारा हॉस्पिटलमध्ये घडली. दरम्यान, याप्रकरणी दोषी डॉक्टर व कर्मचाऱ्यांविरुद्ध कारवाई होत नाही तोपर्यंत मृतदेह ताब्यात न घेण्याचा पवित्रा कुटुंबीयांनी घेतला.
प्रतिभा परदेशी यांचा मुलगा उद्धव व मुलगी शुभांगी यांनी पत्रकारांना दिलेल्या माहितीनुसार,आई प्रतिभा परदेशी यांना कोरोनाची लागण झाल्याने १६ मार्च रोजी सारा हॉस्पिटलमध्ये उपचारासाठी दाखल करण्यात आले होते. अतिदक्षता विभागात त्यांच्यावर उपचार सुरु होते. आता त्यांच्या प्रकृतीत सुधारणा झाली होती, त्याशिवाय कोरोनाची चाचणीही निगेटिव्ह आली होती. मात्र अधूनमधून त्यांना ऑक्सिजनची गरज भासत होती. दोन दिवसापासून वाॅर्डात ऑक्सिजनचा पुरवठा कमी होत होता. ऑक्सिजन पुरवठ्याची दोन लाईन या ठिकाणी आहेत. त्यापैकी एका लाईनचा ऑक्सिजन संपल्यानंतर दुसरी लाईन सुरु करणे अपेक्षित असते, परंतु दोन दिवसापासून एक लाईन बंद झाल्यावर दुसरी लाईन सुरू करण्यात स्टाफकडून दिरंगाई केली जात होती. असाच प्रकार मंगळवारी दुपारी घडला. आई प्रतिभा परदेशी यांना ज्या लाईनमधून ऑक्सिजन पुरवठा होत होता, ती लाईन बंद पडली. डॉक्टरांना त्याची कल्पना दिली असता त्याकडे दुर्लक्ष केले. कर्मचाऱ्यांनीही यात निष्काळजीपणा केला. दहा मिनिटं ऑक्सिजन मिळाला नाही म्हणून आईचा मृत्यू झाल्याचा आरोप उद्धव व शुभांगी या भावंडांनी केला.
दरम्यान, डॉक्टर व कर्मचाऱ्यांकडून रुग्णांची पुरेशी काळजी घेतली जात नसल्याचा आरोपही त्यांनी केला. त्याशिवाय पीपीई कीट किंवा मास्क याचा वापर करणे डॉक्टर व कर्मचाऱ्यांकडून टाळले जाते.
मृतदेह ताब्यात घेण्यास नकार
आईच्या मृत्यूस कारणीभूत ठरलेले डॉक्टर व तेथील स्टाफ यांच्याविरुद्ध जोपर्यंत कारवाई केली जात नाही तोपर्यंत मृतदेह ताब्यात घेणार नसल्याचा पवित्रा दोघं भावंडांनी घेतला. दरम्यान, या घटनेची माहिती मिळाल्यानंतर एमआयडीसी पोलिस ठाण्याचे सहायक फौजदार वंजारी, गणेश शिरसाळे व इतर कर्मचार्‍यांनी तातडीने धाव घेतली. रुग्णांच्या नातेवाईकांनी डॉक्टरवर केलेले आरोप व त्यानंतर त्यांनी केलेले खंडण यामुळे वातावरण अधिक तापले होते.
महापौर, उपमहापौर यांच्याकडून पाहणी
या घटनेच्या पार्श्वभूमीवर महापौर जयश्री सुनील महाजन व उपमहापौर कुलभूषण पाटील यांनी हॉस्पिटलला भेट देऊन प्रतिभा परदेशी ज्या वॉर्डात दाखल होत्या तो वाॅर्ड तसेच ऑक्सिजन पुरवठा होणारी लाईन यासह सीसीटीव्ही फुटेजची तपासणी केली. जिल्हाधिकारी, जिल्हा शल्यचिकित्सक यांनाही नातेवाईकांनी घटनेची माहिती दिली.
महिनाभरापूर्वी पतीचा मृत्यू
प्रतिभा परदेशी यांचा मंगळवारी मृत्यू झाला. गेल्या महिन्यात २५ तारखेला पती कैलाससिंग गणपत परदेशी यांचाही कोरोनाने मृत्यू झाला. महिनाभराच्या अंतरात पती-पत्नीचा मृत्यू झाला. त्याशिवाय याच कुटुंबातील इतर चौघांचाही कोरोनाने मृत्यू झाला. कैलाससिंग परदेशी यांची आई कुवरबाई परदेशी यांचा २२ मार्च रोजी मृत्यू झाला. भाऊ रामसिंग परदेशी यांचा ३१ मार्च रोजी तर भाऊ किशोर गणपत परदेशी यांचा २४ मार्च रोजी संगीता परदेशी यांचा २१ मार्च रोजी मृत्यू झालेला आहे. महिनाभराच्या अंतरात एकाच कुटुंबातील सहा जणांचा कोरोनाने मृत्यू झालेला आहे. विशेष म्हणजे सर्व जण ४५ ते ६५ या वयोगटातील होते.
असे आहेत परदेशी कुटुंबातील मृत्यू
२७ एप्रिल : प्रतिभा कैलाससिंग परदेशी
२५ मार्च : कैलाससिंग गणपत परदेशी
२१ मार्च : संगीता परदेशी
२२ मार्च : कुवरबाई गणपत परदेशी
२४ मार्च : किशोरसिंग गणपत परदेशी
३१ मार्च : रामसिंग गणपत परदेशी
कोट...
ऑक्सिजन पुरवठा करणारी लाईन बंद पडली. दहा मिनिटे ऑक्सिजन पुरवठा थांबला. त्यामुळे आईचा मृत्यू झाला आहे. ऑक्सिजन बंद झाल्याचे स्टाफच्या निदर्शनास आणून दिले, मात्र त्यांनी त्याकडे दुर्लक्ष केले. आईच्या मृत्यूस हॉस्पिटल प्रशासनच जबाबदार आहे. त्यांच्यावर कारवाई व्हावी. गेल्या महिन्यात वडिलांचा मृत्यू झाला आता आई गेली. आणखी कोणाचा बळी जाऊ नये यासाठी कारवाई झालीच पाहिजे.
- उद्धव कैलाससिंग परदेशी, प्रतिभा यांचा मुलगा