चाळीसगाव : चाळीसगाव कृषी उत्पन्न बाजार समितीत ताब्यात घेतलेल्या ट्रकमधील तांदूळप्रकरणी चौकशी करून संबंधित दुकानदार दोषी आढळल्यास त्याच्या दुकानाचा परवाना रद्द करणार असून, त्याबाबत खुलासा करण्याची नोटीस संबंधिताला दिली आहे. गेल्या महिन्यात मार्केटमध्ये तांदूळ खरेदी झाला आहे, त्या तांदळाची व ट्रकमधील तांदळाची खात्री करणे सुरू असल्याची माहिती कृषी उत्पन्न बाजार समितीचे मुख्य प्रशासक दिनेश पाटील यांनी दिली.
ट्रक (क्र. एमएच १९ झेड ०८६०) मध्ये १६० ते १७० तांदूळ भरलेल्या गोण्या व खाली जवळपास ८८ भरलेल्या गोण्या रेशनचा काळ्याबाजारात जात असलेला तांदूळ असल्याच्या संशयावरून काही जणांनी ३ जुलै रोजी रात्री १० वाजेच्या सुमारास जवळपास १७० गोण्यांनी भरलेला एक ट्रक मार्केट सचिवांच्या ताब्यात दिला होता. त्याचा पंचनामा करण्यात येऊन ५ जुलै रोजी मुख्य प्रशासक व सचिव यांनी संबंधित राज ट्रेडर्सचे व्यापारी दुकानदाराला खुलासा देण्याची कारणे नोटीस दिली आहे. याबाबत तहसीलदार चाळीसगाव यांनाही पत्र दिले आहे.
संबंधित दुकानदाराने रविवारी सुटीच्या दिवशी नियमांचे उल्लंघन केले आहे, शिवाय तांदूळ शेतकरी अथवा शेतमजूर यांनी मार्केटला विक्री केला आहे व तशा पावत्यादेखील आहे. या प्रकरणीही चौकशी होणार असून, त्यात व्यापारी दोषी आढळल्यास त्याचा परवाना कायमस्वरूपी रद्द करण्यात येणार असल्याची माहिती दिनेश पाटील यांनी दिली.