पारोळा : तालुक्यातील उंदिरखेडे येथील पशुवैद्यकीय दवाखान्याला आमदार चिमणराव पाटील यांनी अचानक भेट दिली. यावेळी दवाखान्यात एकही कर्मचारी आढळून आला नाही. याबाबत ग्रामस्थांना विचारणा केली असता ग्रामस्थांनी या दवाखान्याच्या समस्यांबाबत पाढाच वाचला. गेल्या तीन महिन्यांपासून गावात एकही वेळा डॉक्टर, कर्मचारी आलेला नाही. त्यामुळे आमची गुरे-ढोरे पूर्णपणे वाऱ्यावर आहेत. जनावरांना योग्य वेळी उपचार न मिळाल्याने आमची खूप मोठी गैरसोय होत असल्याचे ग्रामस्थांनी आमदारांना सांगितले.
आमदारांनी गाठला तालुक्याचा दवाखाना
याची त्वरित दखल घेऊन आमदार पाटील यांनी तालुक्याचा वैद्यकीय दवाखाना गाठला. दवाखान्यात पशुसंवर्धनचे जिल्हा उपायुक्त डॉ. श्यामकांत पाटील, सहाय्यक आयुक्त डॉ. कदम, विस्तार अधिकारी डॉ. शिसोदे, पर्यवेक्षक डॉ. सूर्यवंशी पशुधन, डॉ. राजेंद्र इंगावले हे अधिकारी उपस्थित होते.
डॉक्टर, कर्मचारी महिना-महिना जात नाही
यावेळी अपूर्ण कर्मचारी, ग्रामीण भागांत पशुवैद्यकीय दवाखान्यांमध्ये डॉक्टर, कर्मचारी महिना-महिना जात नाही. त्यामुळे पशुपालन करणाऱ्या शेतकऱ्यांची होत असलेली गैरसोय याचा जाब विचारत उपस्थित अधिकाऱ्यांची चांगलीच कानउघाडणी केली. तसेच रिक्त पदांबाबत त्वरित अहवाल तयार करून वरिष्ठ कार्यालयाकडे पाठवा व त्याची एक प्रत माझ्याकडे पाठवा. मीदेखील याबाबत शासनाकडे पाठपुरावा करणार असल्याचे त्यांनी सांगितले.
सुविधा कशा देता येतील याचे नियोजन करा
याशिवाय उपलब्ध कर्मचाऱ्यांच्या आधारे पशुपालन करणाऱ्या शेतकऱ्यांना सुविधा कशा देता येतील व त्यांची होत असलेली गैरसोय कशी दूर करता येईल याबाबत नियोजन करून समस्यांचे त्वरित निराकरण करण्याचा सूचना आमदार पाटील यांनी उपस्थित अधिकाऱ्यांना दिल्या.