लोकमत न्यूज नेटवर्क
जळगाव : शहरातील छत्रपती शाहू महाराज सरकारी रुग्णालयात शुक्रवारपासून कोरोना लसीकरणाला सुरुवात होणार आहे. गुरुवारी महापौर भारती सोनवणे यांनी रुग्णालयाला भेट देत तयारीचा आढावा घेतला. लसीकरणासंदर्भातील सर्व नियोजनाची माहिती घेऊन याठिकाणी नागरिकांची गर्दी होणार नाही. तसेच झाल्यास योग्य नियोजन करण्याचा सूचना महापौरांना वैद्यकीय विभागाला दिल्या आहेत. सकाळी ९ ते सायंकाळी ५ वाजेपर्यंत हे लसीकरण होणार आहे.
मनपाच्या छत्रपती शाहू महाराज रुग्णालयात मोफत लसीकरण केले जाणार आहे. ६० वर्ष वयोगटावरील आणि ४५ ते ६० गटातील गंभीर आजार असलेल्या रुग्णांना लस दिली जाणार आहे. महापालिकेकडून लसीकरणसाठी केलेल्या तयारीचा महापौरांनी आढावा घेतला. दररोज २०० नागरिकांना लस दिली जाणार असून नागरिकांनी ऑनलाइन नोंदणी करावी, असे आवाहन प्रशासनाने केले आहे. लसीकरणाला येताना नागरिकांनी ओळखीचा पुरावा आणि ४५ ते ६० वर्ष वयोगटातील नागरिकांना ओळखीचा पुरावा आणि आपल्या आजारासंदर्भातील वैद्यकीय अधिकाऱ्यांचे प्रमाणपत्र सादर करणे आवश्यक आहे.
मनपाची तयारी पूर्ण, सुसज्ज यंत्रणा
छत्रपती शाहू महाराज कोविड लसीकरण केंद्रात सुसज्ज प्रतीक्षा आणि नोंदणी केंद्र, लसीकरण कक्ष, निरीक्षण कक्ष तयार करण्यात आला आहे. लसीकरणानंतर नागरिकांना कोणताही त्रास झाल्यास तत्काळ उपचारासाठी बेडची व्यवस्थादेखील करण्यात आली आहे. रुग्णालयाच्या बाहेरील आवारातदेखील शेड उभारण्यात आला असून अधिक गर्दी झाल्यास नागरिकांना त्याठिकाणी प्रतीक्षेत बसण्याची व्यवस्था आहे.