जळगाव : मटन मार्केट येथील न्यू अशोक हार्डवेअर दुकानात डल्ला मारणाऱ्या दोघांना जिल्हापेठ पोलिसांनी अटक केली आहे. दिलीप वसंत सोनवणे (वय २५) व विशाल युवराज सोनवणे (२४, दोन्ही रा. तंट्याभिल सोसायटी, मटन मार्केटजवळ) अटक केलेल्या चोरट्यांची नावे असून, त्यांच्याकडून २२ हजार ५०० रुपयांचा मुद्देमाल हस्तगत करण्यात आला आहे.
भुसावळातील सिंधी कॉलनीतील रहिवासी जितू आहुजा यांचे मटन मार्केट येथे न्यू अशोक हार्डवेअर नावाचे दुकान आहे. अज्ञात चोरट्यांनी या दुकानात डल्ला मारून सुमारे ९६ हजार ५०० रुपयांचा ऐवज चोरी करून पोबारा केल्याची घटना १३ सप्टेंबर रोजी सकाळी ११ वाजता उघडकीस आली होती. त्यानंतर आहुजा यांच्या फिर्यादीवरून अज्ञात चोरट्यांविरुद्ध जिल्हापेठ पोलिसांत गुन्हा दाखल करण्यात आला होता. नंतर घटनास्थळाची पाहणी केल्यानंतर सीसीटीव्ही फुटेजमध्ये चोरटे कैद झाल्याचे पोलिसांना आढळून आले होते. त्या आधारावर पोलिसांनी चोरट्यांचा शोध सुरू केला होता.
तंट्याभिल सोसायटीतून अटक
दरम्यान, हार्डवेअरच्या दुकानात डल्ला मारणारे दोघे मटन मार्केटजवळील तंट्याभिल सोसायटी येथील असल्याची माहिती गुरुवारी जिल्हापेठ पोलिसांना मिळाली. त्यानुसार रात्रीच दिलीप सोनवणे व विशाल सोनवणे या चोरट्यांना तंट्याभिल सोसायटी येथून सापळा रचून पोलिसांनी अटक केली. त्यांच्याकडून २२ हजार ५०० रुपये किमतीच्या स्टील डोअर किट, कडी-कोयंडा, हॅण्डल व दरवाजा स्टॉपर हस्तगत करण्यात आले आहे. ही कारवाई जिल्हा पेठ पोलीस ठाण्यातील तुषार जावरे, मनोज पवार, फिरोज तडवी, महेंद्र बागुल, संतोष सोनवणे, महेंद्र पाटील, जुबेर तडवी, माधव कांबळे, विनोद पाटील, अमित मराठे, रिहान खान यांनी केली.