फोटो क्र.२३,२४
जळगाव : राष्ट्रीय महामार्गावर शुक्रवारी सकाळी ११ वाजता तीन वाहनांचा विचित्र अपघात झाला. त्यात मालवाहू वाहनाने दुचाकीला मागून जोरदार धडक देऊन हे वाहन समोरून येणाऱ्या ट्रकवर धडकले. त्याच्या धडकेत दुचाकीस्वार फुटबॉलसारखे उडून थेट झाडाझुडपातील खड्ड्यात आदळले. या अपघातात अशोक सुखदेव रोकडे (रा.पिंप्राळा) व पंढरी नामदेव नन्नवरे (रा.बांभोरी, ता.धरणगाव) हे जखमी झाले आहेत. या प्रकरणात ट्रकचालकासह क्लिनरला तालुका पोलिसांनी ताब्यात घेतले आहे.
या घटनेबाबत माहिती अशी की, एसटी परिवहन मंडळातील सेवानिवृत्त निरीक्षक पंढरी नामदेव नन्नवरे शुक्रवारी सकाळी बांभोरी येथून दुचाकीने (क्र. एमएच १९ एडब्लू ९१०२ ) आहुजानगर येथे येत होते. त्यांच्या पाठोपाठ मालवाहू वाहन (क्र.एमएच १९ एस ६७५७) जळगावकडे येत होते. या वाहनाने ओव्हरटेकच्या नादात समोर नन्नवरे यांच्या दुचाकीला जोरदार धडक दिली. यानंतर मालवाहू वाहन समोरून पाळधीकडे जात असलेल्या ट्रकवर (क्र.यूपी ७२ एटी ३५६५) धडकला. जोरदार धडकेमुळे दुचाकीवरून नन्नवरे हे फुटबॉलसारखे उडून रस्त्यालगत असलेल्या खड्ड्यात झाडाझुडपांमध्ये पडले. तर त्यांची दुचाकी ट्रकवर जाऊन लटकली होती. ट्रकवर आदळलेल्या मालवाहू वाहनाचा चक्काचूर झाला होता.
पोलिसांमुळे वाचले प्राण
दरम्यान, हा अपघात झाला तेव्हा स्थानिक गुन्हे शाखेचे विजयसिंह पाटील, सुधाकर अंभोरे, राजेंद्र पवार, प्रीतम पाटील, नंदलाल पाटील, भगवान पाटील हे तपासासाठी एरंडोलकडे जात होते. अपघात पाहून त्यांनी वाहनात अडकलेल्या अशोक रोकडे यांना वाहनाचा दरवाजा तोडून बाहेर काढून पोलीस वाहनातूनच रुग्णालयात दाखल केले, तर अपघातावेळी बांभोरी येथील नागरिक जळगावकडे येत असताना त्यांनी अपघातात जखमी झालेल्या दुचाकीस्वार पंढरी नन्नवरे यांना ओळखले. त्यांनी तत्काळ रिक्षातून शहरातील रुग्णालयात दाखल केले. त्यांचीही प्रकृती चिंताजनक असून, उपचार सुरू आहेत. अपघातामुळे महामार्गावर वाहनांच्या रांगा लागल्या होत्या. तसेच काही काळासाठी वाहतूक खोळंबली होती. घटनेची माहिती मिळताच तालुका पोलिसांनी घटनास्थळ गाठून अपघातग्रस्त वाहने महामार्गावरून बाजूला केले. तसेच वाहतूक सुरळीत केली. याप्रकरणी तालुका पोलिसांनी ट्रकसह चालक तसेच क्लिनरला ताब्यात घेतले आहे.