लोकमत न्यूज नेटवर्क
जळगाव : मुंबईहून हावडाकडे जाणाऱ्या रेल्वेतून प्रवास करणाऱ्या अबजूर शेख जियाऊल हक (वय २३, रा. रहिमपूर, माणिकचक, इनायतपूर जि. मालदा पश्चिम बंगाल) या परप्रांतीय तरूणाचा पाय घसरल्याने खाली पडून मृत्यू झाल्याची घटना गुरुवारी दुपारी साडेतीन वाजेच्या सुमारास तालुक्यातील म्हसावद रेल्वे स्थानकाजवळ घडली.
अबजूर शेख जियाऊल हक हा तरुण नवी मुंबईतील घनसोली येथे बांधकामाच्या ठिकाणी मजूर म्हणून कामाला आला होता. गुरुवारी सकाळी त्याचा भाचा मसीद ऊर रहेमान यांच्यासोबत रमजाननिमित्त मुंबईहून पश्चिम बंगाल येथे गावी जाण्यासाठी सकाळी ८ वाजता मुंबईहून बसले होते. दुपारी ३ ते ३.३० वाजेच्या दरम्यान मुंबई-हावडा मेलने पाचोराकडून जळगावकडे जात असतांना अबजूर शेख हा पाणी पिण्यासाठी जात असतांना रेल्वे बोगीच्या दरवाजाजवळ पाय घसरल्याने खाली पडल्याने जागीच मृत्यू झाला. हा अपघात रेल्वे खंबा क्रमांक ४००/ १३-१५ जवळ घडला. म्हसावद रेल्वे स्टेशन मास्तर राजपूत यांनी जळगाव रेल्वे पोलिसांना माहिती दिली. हवालदार अनिंद्र नगराळे यांनी शासकीय वैद्यकीय महाविद्यालयात मृतदेह आणला. मयत तरूण हा अविवाहित असून त्याच्या पश्चात चार बहिणी, तीन भाऊ आणि आई असा परिवार आहे. याप्रकरणी जळगाव रेल्वे पोलिसात अकस्मात मृत्यूची नोंद करण्यात आली आहे. तपास अनिंद्र नगराळे करीत आहे.