गुन्हा दाखल : तीन जण जखमी
जळगाव : शहरातील मानराज पार्कजवळील राममंदिर ट्रस्टच्या मैदानावर खेळण्यास गेलेल्या मुलाला का मारहाण केली, याचा जाब विचारण्यास गेलेल्या वडिलांसह मुलाचा मामा तसेच आतेभावाला तीन जणांनी बॅट, स्टम्पने मारहाण करून १० हजार रुपये बळजबरीने काढून घेतल्याची धक्कादायक घटना सोमवारी दुपारी अडीच वाजेच्या सुमारास घडली होती. याप्रकरणी मंगळवारी रामानंदनगर पोलिसात श्रीरंग पाटीलसह तीन जणांविरोधात गुन्हा दाखल झाला आहे.
पिंप्राळा परिसरातील विद्यानगर येथे राजेंद्र शिवराम सोनवणे (वय ४१) हे कुटुंबासह वास्तव्यास आहेत. त्यांचा मुलगा जय हा मानराज पार्कजवळील राममंदिर ट्रस्टच्या मैदानावर खेळण्यासाठी गेला असता, त्याला तीन ते चार जणांनी विनाकारण मारहाण केली होती. विनाकारण मारहाण का केली याबाबतचा जाब संबंधितांना विचारण्यासाठी सोमवारी जयचे वडील राजेंद्र सोनवणे, आतेभाऊ कुलभूषण साळुंखे व मामा पवन साहेबराव सैंदाणे हे मैदानावर गेले असता, संबंधितांनी जयच्या वडिलांच्या पाठीत क्रिकेट खेळण्याच्या स्टम्पने पाठीत मारहाण केली, तर याचवेळी कुलभूषण साळुंखे यासही स्टम्पने मारहाण करण्यात आली. पवन सैंदाणे यांच्या डोक्यात एकाने बॅट मारुन दुखापतीचा प्रयत्न केला. मात्र पवन यांनी ते चुकविल्याने त्याच्या हातास गंभीर दुखापत झाली आहे. यावेळी पवनच्या खिशातील १० हजार रुपयेही संबंधितांनी हिसकावून घेतले. या मारहाणीत राजेंद्र सोनवणे यांच्यासह कुलभूषण साळुंखे, पवन सैंदाणे यांच्यावर उपचार सुरू आहेत. याप्रकरणी राजेंद्र सोनवणे यांच्या फिर्यादीवरुन रामानंदनगर पोलिसात श्रीरंग पाटील यांच्यासह तिघांविरोधात दरोड्यासह मारहाणीचा गुन्हा दाखल झाला आहे. तपास सहायक पोलीस निरीक्षक संदीप परदेशी हे करीत आहेत.