जळगाव - शहरातील शिवकॉलनी येथील चंद्रकांत मोहन बाविस्कर यांच्या बंद घरात अज्ञात चोरट्यांनी डल्ला मारल्याची घटना उघडकीस आली आहे. चोरट्यांनी घरातून दहा हजारांची रोकड लंपास केली असून याप्रकरणी रामानंदनगर पोलीस ठाण्यात गुरुवारी रात्री गुन्हा दाखल करण्यात आला.
चंद्रकांत बाविस्कर हे कुटुंबासह शिव कॉलनी येथे वास्तव्यास आहेत. हातमजुरी करून ते कुटुंबाचा उदरनिर्वाह करतात. २ मार्च रोजी नातेवाइकांकडे ते काही कामानिमित्ताने घराला कुलूप लावून गेले होते. बंद घर असल्याची संधी साधून अज्ञात चोरट्यांनी त्यांच्या घरात डल्ला मारला. कुलूप तोडून घरातील कपाटात ठेवलेले १० हजार रुपयांची रोकड लंपास केली. गुरुवारी चंद्रकांत बाविस्कर हे गावाहून परतल्यानंतर त्यांना घराचे कुलूप तुटलेले आढळून आले. घरात जाऊन पाहिले असता कपाटातील रक्कम दिसून आली नाही. चंद्रकांत बाविस्कर यांच्या फिर्यादीवरून रामानंदनगर पोलीस ठाण्यात अज्ञात चोरट्यांविरुध्द गुन्हा दाखल करण्यात आला आहे. पुढील तपास पोहेकॉ उषा सोनवणे करीत आहे.