दोघांना तांबापुरातून अटक : एलसीबीची कारवाई
लोकमत न्यूज नेटवर्क
जळगाव : मोहाडी रस्त्यावरील पद्मावती अपार्टमेंटच्या बंद घरामध्ये डल्ला मारणाऱ्या चोरट्यांना एलसीबीच्या पथकाने गुरुवारी तांबापुरातून जेरबंद केले. प्रकाशसिंग मितसिंग बावरी (२८), हिंमतसिंग चरणसिंग बावरी (३२,रा. शिरसोली नाका, तांबापुरा) असे अटक केलेल्या चोरट्यांची नावे आहेत.
मोहाडी रस्त्यावर पद्मावती अपार्टमेंट आहे. या अपार्टमेंटमधील एका बंद घरामध्ये अज्ञात चोरट्यांनी डल्ला मारून दोन हजारांची रोकड व चांदीचे दागिने चोरून नेल्याची घटना १४ एप्रिल रोजी घडली होती. याप्रकरणी रामानंदनगर पोलीस ठाण्यात अज्ञात चोरट्यांविरुध्द गुन्हा दाखल करण्यात आला होता. दरम्यान, ही चोरी तांबापुरा येथील दोन तरुणांनी केली असल्याची माहिती एलसीबीतील पोलीस कर्मचारी शरद भालेराव यांना मिळाली. त्यानुसार एलसीबीच्या पथकाने गुरुवारी तांबापुरा भागातून प्रकाशसिंग बावरी, हिंमतसिंग बावरी यांना सापळा रचून अटक केली. पुढील कार्यवाहीसाठी दोघांना रामानंदनगर पोलिसांच्या ताब्यात देण्यात आले आहे.