हवा तपासणी करणारा चालक ठार
फोटो
जळगाव : महामार्गाला लागून थांबलेल्या कंटेनरवर धुळ्याकडून आलेला टॅंकर धडकला.यात कंटेनरच्या टायरची हवा तपासणी करणारा चालक दिलीप मारुती पाखरे (रा. पिंपळगव्हाण ता. पाथरी जि. अहमदनगर ) ठार झाला तर नामदेव भीमराव महाजन (रा.धामणगाव ता. आष्ठी जि. बीड ) जखमी झाला आहे. हा अपघात रविवारी सकाळी साडेसहा वाजता अजिंठा चौफुली जवळ झाला. याप्रकरणी रात्री एमआयडीसी पोलिसात टँकर चालकावर गुन्हा दाखल करण्यात आला आहे.
केमिकलचे ड्रमने भरलेला कंटेनर (क्रमांक एमएच ४६ एच ६४९७) चालक दिलीप मारूती पाखरे व नामदेव भीमराव महाजन असे दोघे रविवारी सकाळी सहा वाजता अजिंठा चौकानजीक पार्कींगला लावत होते. ६.२० वाजेच्या सुमारास धुळ्याकडून भुसावळकडे जाणारा टँकर (एमएच ४३ बीपी ५५६९) भरधाव वेगाने येवून उभ्या कंटेनरला जोरदार धडक दिली. या अपघातात कंटेनर चालक दिलीप पाखरे हे चाकाखाली आल्याने त्यांचा जागीच मृत्यू झाला तर नामदेव महाजन हे गंभीर जखमी झाले. अपघात होताच टँकर चालक टँकर सोडून पळून गेला. याप्रकरणी नामदेव महाजन यांच्या फिर्यादीवरून अज्ञात चालकाविरूध्द एमआयडीसी पोलिसात गुन्हा दाखल करण्यात आला आहे.