जळगाव : गावाच्या विकासासाठी अडीच-अडीच वर्षे सरपंचपद ठेवत दोन्ही सदस्यांसोबत राहण्याचा भादली येथील ग्रामपंचायत सदस्यांनी संकल्प केला आहे. यासाठी त्यांनी थेट महादेवाची शपथ घेत ११ सदस्य साथ सोडणार नसल्याचा निश्चय केला आहे.
तालुक्यातील ४३ ग्रामपंचायतींची निवडणूक नुकतीच झाली. यामध्ये सरपंचपदासाठी रस्सीखेच सुरू असतानाच भादली बुद्रुक येथील नवनिर्वाचित ग्रामपंचायत सदस्यांनी महादेव मंदिरात जाऊन गावविकासासाठी एकजुटीचा संकल्प केला. यामध्ये महादेव पिंडीवर हात ठेवून सुरुवातीचे अडीच वर्षे सर्व जण मिलिंद चौधरी यांच्यासोबत व नंतरचे अडीच वर्षे मनोज चौधरी यांच्यासोबत राहू, अशी शपथ घेतली. विशेष म्हणजे, यावेळी मनोज चौधरी हे उपस्थित नसले तरी हजर असलेल्या ११ सदस्यांनी अडीच वर्षे चौधरी यांच्यासोबतच राहण्याचा संकल्प केला. यावेळी सर्वांनी महादेवाच्या पिंडीवर पाणी सोडले. आम्ही सर्व जण गावाच्या सर्वांगीण विकासासाठी एकत्र आलेलो आहोत, यात कोणताही बदल होणार नाही, असेही यावेळी सर्वांनी ठरविले. या संकल्पाचा व्हिडीओ सोशल मीडियावर व्हायरल झाला असून हा चांगलाच चर्चेचा विषय ठरत आहे.
यावेळी सदस्य अंजली पाटील, विद्या कावळे, अरुण सपकाळे, कीर्ती कोळी, मीराबाई कोळी, संदीप कोळी, परेश रडे, विजया चौधरी, पूजा नारखेडे, मिलिंद चौधरी, शोभा झांबरे हे सदस्य उपस्थित होते.