लोकमत न्यूज नेटवर्क
जळगाव : शहरातील रस्त्यांची स्थिती अतिशय बिकट झाली असून, मनपाकडून आर्थिक परिस्थितीचे कारण देत शहरातील रस्त्यांची कामे देखील थांबली आहेत. त्यामुळे वैतागलेल्या जळगावकरांनी मनपा प्रशासनाला आपली किडनी घेऊन, ती विक्री करून मिळालेल्या रकमेतून शहरातील रस्ते तयार करण्याचे साकडे घातले आहे. कर भरून देखील जळगावकरांना सुविधा मिळत नसतील तर करासोबत किडनी देखील घ्या; मात्र शहरातील रस्ते करा अशी मागणी शहरातील नागरिकांनी केली आहे.
सोमवारी सामाजिक कार्यकर्ते दीपककुमार गुप्ता यांच्या नेतृत्वाखाली अनेक नागरिकांनी मिळून मनपा प्रशासनाला निवेदन देण्यात आले. यावेळी शिवराम पाटील, विजय बांदल, अमोल कोल्हे, मतिन पटेल, संजय पाटील, अनिल नाटेकर, किरण ठाकूर यांच्यासह अनेक नागरिक उपस्थित होते. दीपककुमार गुप्ता यांनी मनपाच्या अतिरिक्त आयुक्त विद्या गायकवाड यांना निवेदन दिले. शहरातील रस्त्यांची स्थिती खराब झाली असून, यामुळे जळगावकरांना पाठीचे, मानेचे, मणक्यांचे विकार होत आहेत. त्यात अनेक लहान-मोठे अपघात होऊन हाता-पायालादेखील दुखापत होत आहे. इतर विकार होण्यापेक्षा आता आमच्या किडनी घेऊन, ती विक्री करून मिळालेल्या रकमेतून खड्डे दुरुस्त केले तर अनेकांना भविष्यात होणाऱ्या त्रासापासून दूर ठेवता येईल असे गुप्ता यांनी दिलेल्या निवेदनात म्हटले आहे.
याबाबत गुप्ता यांनी निवेदनाच्या प्रती जिल्हाधिकारी, नगरविकास मंत्री व मुख्यमंत्री यांच्याकडे देखील पाठविल्या आहेत. चोपडा,पाचोरा सारख्या नगरपालिकांच्या हद्दीत चांगले रस्ते असताना, महापालिकेच्या हद्दीत चांगले रस्ते मिळत नसल्याने आता नागरिकांना चांगल्या रस्त्यांसाठी किडनी देण्याशिवाय पर्याय नसल्याचे गुप्ता यांनी आपल्या निवेदनात म्हटले आहे.