लोकमत न्यूज नेटवर्क
जळगाव : चैतन्य विजय इनामदार याने जळगावच्या तायक्वांदो संघाकडून खेळायला सुरुवात केली. त्यात त्याने सातत्याने यश मिळवले. राज्यस्तरीय स्पर्धांमध्ये खेळला आणि मग राष्ट्रीय आणि आंतरराष्ट्रीय स्पर्धांमध्येदेखील पदकांची कमाई केली. त्याने २०१९ च्या जूनमध्ये इंडिया ओपन तायक्वांदोमध्ये तर दक्षिण आशियाई स्पर्धेत कांस्यपदकाची कमाई केली.
चैतन्य इनामदार हा मूळचा पुण्याचा आहे. मात्र तायक्वांदोसाठी जळगावमध्ये असलेली प्रशिक्षण सुविधा आणि उपलब्ध असलेले प्रायोजक बघून तो जळगावला आला. त्यानंतर त्याने जिल्हास्तरीय स्पर्धांमध्ये आपली चमक दाखवली. त्याला जळगावमध्ये तायक्वांदो प्रशिक्षक अजित घारगे यांचे मार्गदर्शन लाभले. त्यानंतर त्याने आपला खेळातील दबदबा दाखवून दिला. त्याने ८७ किलो वरील गटात त्याने राज्यस्तरीय स्पर्धांमध्ये शानदार कामगिरी केली.
२०१२ मध्येच जळगावला झालेल्या राज्यस्तरीय स्पर्धेत जिल्हा संघाकडून खेळताना शानदार कामगिरी केली. त्यानंतर ३४ व्या अखिल भारतीय तायक्वांदो स्पर्धेत खेळताना आपल्या खेळाचा दम दाखवला. नंतर चॅलेंज द चॅम्पियन आणि काश्मीर ओपन या स्पर्धांमध्ये खेळून त्याने ८७ किलोवरील गटात आपल्या खेळाचा दम दाखवला.
२०१९ हे वर्ष त्याच्यासाठी खास महत्त्वाचे ठरले. त्याने जून महिन्यात झालेल्या इंडिया ओपनमध्ये रौप्यपदक पटकावले. नंतर लगेचच झालेल्या दक्षिण आशियाई स्पर्धेत त्याने कांस्य पदक पटकावले. एकाच वर्षी दोन मोठ्या आंतरराष्ट्रीय स्पर्धांमध्ये कांस्यपदक पटकावल्याने त्यांच्या कामगिरीची चर्चा झाली. मात्र हीच स्पर्धा त्याच्यासाठी अखेरची मोठी स्पर्धा ठरली. कोरोनामुळे लॉकडाऊन सुरू झाले आणि सर्वच स्पर्धा बंद झाल्या. मात्र तरीही चैतन्य याने जिद्द सोडली नाही. त्याने घरीच सराव सुरू ठेवला आहे.
कोट - सध्या घरीच सराव सुरू आहे. मधल्या काळात काही प्रशिक्षण शिबिरांना गेलो होतो. मात्र लगेचच लॉकडाऊनदेखील सुरू झाले. भविष्यात ज्या स्पर्धा होतील त्यांच्यासाठी सध्या तयारी सुरू आहे. - चैतन्य विजय इनामदार, तायक्वांदो खेळाडू
इंडिया ओपन सिल्व्हर - २०१९ जून
साऊथ एशियन गेम्स ब्रॉन्झ २०१९ डिसेंबर