पोलिसांनी दिलेल्या माहितीनुसार, आव्हाणे येथील एका तरुणावर कर्ज असल्याने या कर्जाची फेड करण्यासाठी त्याने स्वत:चे ट्रॅक्टर घेऊन सोबत आकाश व सागर या दोघांना नेत शेतकऱ्यांच्या ट्रॅक्टरच्या ट्रॉली चोरण्याचा उद्योग सुरू केला होता. शिरसोली येथे जळके रस्त्यावरून चार महिन्यांपूर्वी या तिघांनी ट्रॉली चोरी करून तिचा चेचीस क्रमांक खोडला व रंग बदलवून विक्री केल्याची माहिती स्थानिक गुन्हे शाखेचे जितेंद्र पाटील यांना मिळाली होती. त्यानुसार हवालदार विजयसिंग पाटील, जितेंद्र पाटील, सुधाकर अंभोरे, नितीन बाविस्कर, प्रीतम पाटील, राहुल पाटील व अशोक पाटील यांच्या पथकाने आव्हाणे गाठून सागर व आकाश याला ताब्यात घेतले. त्यांच्याकडे चौकशी केली असता ट्रॉली चोरल्याची कबुली देत एका सहकाऱ्याचे नावही सांगितले. त्याला पैशाची गरज असल्याने त्याच्याच ट्रॅक्टरच्या सहाय्याने शिरसोली येथून ट्रॉली लांबविल्याचे सांगितले, दरम्यान, त्याने ज्याला ही ट्रॉली विकली होती, त्याच्याकडून ती हस्तगत करण्यात आली आहे. त्यांच्याकडून आणखी ट्रॉली मिळण्याची शक्यता आहे. वडली, ता. जळगाव येथूनही काही महिन्यांपूर्वी प्रदीप प्रेमराज पाटील या शेतकऱ्याची ट्रॉली चोरीला गेली आहे. दरम्यान, अटकेतील दोघंही संशयित सराईत असल्याची माहिती पोलिसांनी दिली. शिरसोली येथील चोरी गेलेली ट्रॅक्टर ट्राॅली सापडली आहे.
शिरसोलीतून आणखी २ ट्रॉली गेल्या होत्या चोरीला
शिरसोली येथील शेतकरी निजामुद्दीन पिंजारी यांची ट्रॉली सहा महिन्यांपूर्वी चोरीला गेली आहे. ती आव्हाणे येथे रंग बदलून वापरण्यात येत असल्याची माहिती पोलिसांना मिळाली व त्यानंतर ही ट्रॉली सापडली. शिरसोली येथून अशाच प्रकारे तीन शेतकऱ्यांच्या घरासमोर लावलेल्या ट्रॉली अंधाराचा फायदा घेत चोरट्यांनी लांबविल्या होत्या. या ट्रॉलीदेखील सापडतील की नाही, असा प्रश्न उपस्थित केला जात आहे.